Соборените американски авиони ја доведоа во прашање воздушната доминација на Трамп

Војната на САД со Иран влегува во нова, потешка фаза откако два американски борбени авиони беа соборени над иранска територија.

Иако овие инциденти не значат дека Иран е израмнет со САД во воената моќ, тие покажуваат колку војна каде страните имаат многу различни воени сили и можности, може да биде ризична. Американската јавност веќе е скептична за оправданоста на конфликтот.

Преценети тврдења на Трамп и Хегсет

Претседателот Доналд Трамп и министерот за одбрана Пит Хегсет долго време тврдеа дека САД имаат целосна контрола над иранскиот воздушен простор. Тие постојано велеа дека Иран не може да возврати и дека американските авиони може слободно да летаат над Техеран и други делови од земјата.

На брифинг на 4 март, Хегсет рече: „Во наредните неколку дена, најмоќните воздушни сили во светот ќе имаат целосна контрола над иранското небо. Иран нема да може да стори ништо.“

Трамп, исто така, на 24 март изјави: „Имаме авиони што летaт над Техеран, тие не можат да сторат ништо за тоа. Можеме да ги нападнеме нивните електрани, а тие не можат ништо да направат.“

Двајцата го претставуваа Иран како земја без војска, морнарица, воздушни сили и противвоздушни системи. Во обраќање во Белата куќа, Трамп истакна: „Нивната радарска технологија е 100% уништена. Ние сме непобедливи како воена сила.“

Сега, по соборувањето на два авиони, станува јасно дека овие тврдења се преценети. Досега се изгубени само два авиони, но тоа доволно ја подрива сликата на „непобедливост“ што администрацијата се обидуваше да ја создаде.

Историја на преувеличувања

Ова не е првпат администрацијата на Трамп да ја преувеличува воената успешност. По нападите на иранските нуклеарни објекти минатото лето, Трамп тврдеше дека програмата е „целосно уништена“, иако раната американска разузнавачка проценка покажуваше спротивно. Само девет месеци подоцна, Иран повторно беше прикажан како непосредна нуклеарна закана.

Ограничени американски загуби, но високи економски трошоци

Досега има ограничени загуби од американска страна, без познати смртни случаи во последните три недели. Сепак, економските последици од ефективното затворање на Ормутскиот теснец и растот на цените на горивото веќе ја зголемуваат скепсата на јавноста. Американците се сомневаат дали војната вреди за трошоците.

Текстот Соборените американски авиони ја доведоа во прашање воздушната доминација на Трамп е превземен од МАКФАКС.