Трамп: Ако Иран се обиде со трикови, тоа ќе им биде крајoт, повеќе нема да слушнете за Иран

Американскиот претседател Доналд Трамп изјави дека размислува за крај на војната против Иран, која трае десет дена, но оцени дека САД се „далеку пред планот“, пренесе Си-Би-Ес њуз.

На прашањето дали војната би можела наскоро да заврши, Трамп одговори потврдно, нагласувајќи дека тоа е неговата главна цел. „Далеку сме пред планот… Не знам, зависи. Размислувам за крајот на војната, јас и никој друг“, рече тој.

Во телефонско интервју, Трамп изјави дека според него конфликтот е „практично завршен“.

Трамп рече дека иранската војска е значително ослабена. „Немаат морнарица, немаат комуникации, немаат воздушни сили. Нивните ракети се сведени на остатоци“, изјави тој.

Американскиот претседател испрати и остра порака до Техеран.

„Испукаа сè што имаа. Подобро е да не се обидуваат со никакви трикови, бидејќи тоа ќе биде крај на таа земја. Ако направат нешто лошо, тоа ќе биде крај на Иран и повеќе нема да слушнете за тоа име“, рече Трамп.

Тој додаде дека САД размислуваат и за преземање на контролата врз Ормутскиот теснец.

Фото: ЕПА

Текстот Трамп: Ако Иран се обиде со трикови, тоа ќе им биде крајoт, повеќе нема да слушнете за Иран е превземен од МАКФАКС.