Трамп: „Канада краде од нас со години, ние ги зголемуваме царините за возила на 50 проценти“

Соединетите Американски Држави ќе ги удвојат царините за канадските возила од 2027 година, објави денес американскиот претседател Доналд Трамп. Во исто време, тој ја обвини Отава дека „ги краде Соединетите Американски Држави со години“. Соопштението дојде откако преговорите за трговски договор не успеаја, пишува „Euronews“.

„На 1 јануари 2027 година, царините за сите автомобили, камиони (големи и мали), автоделови и челик ќе бидат зголемени на 50 проценти“, напиша Трамп во објава на неговата мрежа Truth Social. Сегашните американски царини за автомобили се 25 проценти за делови што не се произведени во САД.

„Не можеме да го прифатиме она што го понудија“
Заканите доаѓаат во услови на трговски спор меѓу САД и Канада што ескалираше во петокот. Потоа, преговорите за договор за избегнување на царини од 50 проценти за одредени канадски стоки пропаднаа, при што двете страни се обвинуваа меѓусебно дека се обидуваат да направат промени во последен момент.

Канадскиот премиер Марк Карни рече дека Канада била принудена да се откаже од „лош“ договор. „Не можеме да го прифатиме она што го понудија и нема да го дадеме она што го побараа“, рече Карни.

Новите царини, кои стапија на сила завчера, опфаќаат канадска стока во вредност од околу 20 милијарди долари. Карни предупреди дека Отава ќе возврати со царини од долар за долар за да ги заштити своите работници и бизниси. „Нашиот одговор ќе биде насочен кон сектори како што се челик, млечни производи, апарати за домаќинство, земјоделска опрема, пулпа и хартија и електроника“, додаде Карни.

„Пропуштена можност за Канада“
Канцеларијата на американскиот трговски претставник го опиша прекинот на разговорите како „пропуштена можност“ за Канада, за која вели дека спроведува „долгорочна одмазда“ против САД.

„И покрај понудата на САД до Канада да добие најдобар третман од сите главни извозници на нашиот пазар, новите барања на Канада и повлекувањето на претходните обврски ја нарушија внимателната рамнотежа постигната во последните денови“, се вели во соопштението.

Трамп, исто така, се осврна на она што го нарече „смешно високи царини“ на Канада за американските земјоделци денес. Тој рече дека повеќе нема да се однесува кон земјата „како кон држава“. Американскиот претседател постојано сугерираше дека Канада треба да стане „51-ва држава“ на САД, а минатата недела рече дека Отава сака „придобивки на држава, а тоа не е“.

Текстот Трамп: „Канада краде од нас со години, ние ги зголемуваме царините за возила на 50 проценти“ е превземен од МАКФАКС.