Хамас: Нема да се откажеме од нашето оружје

Вооруженото крило на Хамас уште еднаш денес изјави, пред состанокот меѓу американскиот претседател Доналд Трамп и израелскиот премиер Бенјамин Нетанјаху посветен на иднината на Појасот Газа, дека нема да се разоружа.

Бригадите Изудин ал-Касам, исто така, потврдија дека нивниот портпарол Абу Обеида е убиен, што Израел го објави во август.

„Нашиот народ ќе се брани и нема да се откаже од своето оружје сè додека трае окупацијата, нема да се предаде, дури и ако мора да се брани со голи раце“, рече нивниот нов портпарол, кој го зеде истото воено име, во видео порака објавена на Телеграм.

Соопштението беше објавено неколку часа пред состанокот меѓу израелскиот премиер Бенјамин Нетанјаху и американскиот претседател Трамп во Флорида.

Вашингтон и регионалните медијатори сакаат да го забрзаат темпото на спроведување на договорот за прекин на огнот меѓу Израел и Хамас во Појасот Газа со цел да се премине на втората фаза. Договорот стапи на сила во октомври.

Во срцето на преговорите е разоружувањето на Хамас, кој одбива да го стори тоа. Хамас неодамна предложи „замрзнување или складирање оружје“ и префрлање на одговорноста врз Израел.

„Ги повикуваме сите вклучени страни да работат на разоружување на смртоносното оружје на окупацијата, кое се користело и продолжува да се користи за истребување на нашиот народ“, рече новиот Абу Обеида.

 

фото/депозитфотос

Текстот Хамас: Нема да се откажеме од нашето оружје е превземен од МАКФАКС.