Рускиот претседател Владимир Путин потпиша закон со кој се овластува развој на државна апликација за пораки интегрирана со владини услуги.


Овој потег е дел од напорите на Москва да ја намали својата зависност од платформи како WhatsApp и Telegram. Русија долго време се обидува да воспостави таканаречен дигитален суверенитет преку промовирање на домашни услуги.

Нејзиниот притисок за замена на странските технолошки платформи стана поитен откако некои западни компании се повлекоа од рускиот пазар по инвазијата на Москва врз Украина во февруари 2022 година, објави Ројтерс.

Руските пратеници тврдат дека апликацијата во државна сопственост ќе има функции што ги немаат WhatsApp и Telegram. Сепак, критичарите предупредуваат дека државната контрола на апликацијата од страна на Русија претставува ризик за приватноста и личните слободи.

Михаил Климарев, директор на Друштвото за заштита на интернетот, руска група за дигитални права, претходно овој месец изјави дека очекува Русија да ги забави WhatsApp и Telegram за да ги охрабри луѓето да се префрлат на новата апликација.