Кога Samsung ја објави серијата Galaxy S24, компанијата откри дека одредени карактеристики на Galaxy AI ќе доаѓаат и кај постарите телефони. Сега и официјално е потврдено кои способности за вештачка интелигенција доаѓаат кај постарите уреди на Samsung.


Според информациите на Мишал Рахман, британскиот Samsung потврдил најмалку четири функции на Galaxy AI кои доаѓаат кај постарите уреди. Тоа се: Circle to Search, Live Translate, Note Assist и Photo Assist.

Функцијата Circle to Search ви овозможува да означите, нацртате или изберете што било на екранот и да започнете пребарување на Google за него. Со помош на Live Translate можете да преведувате повици во реално време, а доволно е едно лице да има соодветен Galaxy уред. Note Assist помага при креирање резимеа и нивно форматирање, а Photo Assist носи генеративно уредување во Галеријата.

Samsung претходно објави дека карактеристиките на Galaxy S24 AI ќе пристигнат на серијата Galaxy S23, Galaxy S23 FE, Galaxy Z Fold 5 и Flip 5, како и на серијата Galaxy Tab S9 во првата половина од оваа година. Се очекува да дојде заедно со ажурирањето на One UI 6.1.

Не е познато дали преостанатите способности за вештачка интелигенција, како што се генеративни позадини, Chat Assist и други, ќе дојдат во иднина.