Според извештаите, Apple сè уште не одлучил дали да лансира наследник на големиот хит од оваа година.


Порано оваа година, Apple го издаде првиот модел од новата линија на телефони, кој го замени iPhone SE. Така, беше издаден iPhone 16e, кој забележа одлична продажба и ѝ помогна на компанијата да се искачи на врвот на глобалните испораки на телефони во првиот квартал од 2025 година.

Сепак, компанијата од Купертино наводно сè уште не одлучила дали да лансира наследник на големиот хит од оваа година.

Аналитичарот Марк Гурман сугерира дека Apple сè уште не донел конечна одлука за објавувањето на моделот iPhone 17e, а таа одлука се очекува во наредните месеци.

Додека западните извори тврдат дека Apple е неодлучен кога станува збор за објавување на моделот iPhone 17e, кинеските извори блиски до синџирот на снабдување на Apple веруваат поинаку. Минатата недела, Fixed Focus Digital објави дека Apple ќе го издаде iPhone 17e следната година и дека телефонот е речиси во фаза на тест производство.