Nokia е позната по создавањето на некои од најиздржливите телефони, а компанијата наскоро ќе дебитира на друг пазар.

Првиот лаптоп на Nokia ќе биде PureBook Pro, кој ќе има елегантен дизајн, процесор Intel Core i3 од 12-та генерација и прифатлива цена.

Иако овие лаптопи ќе го носат брендот на Nokia, тие ќе бидат дизајнирани од стартап компанијата OFF Global.

Првично во понуда ќе има модели од 15,6 и 17,3 инчи, но би можеле да видиме и помали Nokia PureBook лаптопи, во зависност од успехот на серијата.

Кога станува збор за естетиката, се чини дека лаптопот на Nokia е инспириран од 14-инчниот MacBook Pro модел. Има заоблени рабови, алуминиумска горна обвивка во сина, црвена, бела и црна боја.

Во однос на хардверот, лаптопите ќе имаат Intel Core i3-1220P процесор, 8GB DDR4 RAM и 512GB M.2 SSD. Има и IPS панел од 1080p. Опциите за поврзување вклучуваат две USB-C порти, USB 3.2 порт, читач за microSD и порт од 3,5 mm.

Точниот датум на издавање не е познат, а се посочува дека Nokia PureBook Pro ќе има цена од 699 евра за 15-инчен и 799 евра за 17-инчен модел во Европа.