Samsung ја заврши презентацијата на своите уреди од високата класа оваа година. Така, на почетокот на годината беше претставена серијата Galaxy S23, додека неодамна беа претставени новите генерации на телефони на преклоп од јужнокорејската компанија. Сега пристигнуваат нови детали за моделите Galaxy S24 и Galaxy S24+, а се однесуваат на дизајнот на овие уреди.


Познатиот типстер Ice Universe известува дека Galaxy S24 и Galaxy S24+ најверојатно ќе пристигнат следната година со промена на дизајнот во споредба со нивните претходници.

Имено, овој типстер посочува дека телефоните би можеле да имплементираат рамни рамки на страните, што ќе биде во склад со неодамна претставените телефони на преклоп Samsung Galaxy Z Fold5 и Samsung Galaxy Z Flip5.

Galaxy S23 и Galaxy S23+ имаат рамни позадини, но малку заоблени рамки, но тоа очигледно ќе се промени. На фотографиите подолу, можете да видите како Galaxy S24 и Galaxy S24+ би можеле да изгледаат со фокус на рамките.

Во овој извештај, Ice Universe не нуди детали за дизајнот на телефонот Samsung Galaxy S24 Ultra, но претходно беше откриено дека најверојатно ќе го задржи дизајнот на неговиот претходник.

Една од позитивните промени кај моделите Galaxy S24 би можело да биде зголемувањето на RAM и внатрешната меморија на основните модели. Имено, неодамна се појави извештај дека Samsung ќе ги опреми основните варијанти на телефоните Galaxy S24, Galaxy S24+ и Galaxy S24 Ultra со 12 GB работна меморија (RAM) и 256 GB простор за складирање, што ќе биде подобрување во однос на претходната серија.

Сепак, прашање е дали овие основни верзии ќе ги задржат истите цени како и овогодинешните основни верзии кои пристигнуваат со помалку RAM и внатрешна меморија. Доколку Samsung ги задржи цените исти, тоа ќе биде одлична вест за љубителите на Galaxy.