Водечкиот јапонски производител на автомобили Toyota Motors работи на нов мотор на водород како дел од својот концепт за намалување на испуштањето штетни гасови, соопшти корпорацијата денеска.

Новиот турбо-мотор ќе биде трицилиндричен, со зафатнина од 1,6 литри. Ќе работи со согорување на водород и модифицирани системи за вбризгување и снабдување со гориво. Таквиот мотор е сличен на бензинскиот, но сепак, со исклучок на помалата потрошувачка на моторно масло, нема да има никакво штетно испуштање. Покрај тоа, процесот на согорување на водородот е и побрз, што позитивно ќе влијае на динамиката на автомобилот.

Toyota очекува да го тестира својот проект во развој во мај, на патека во префектурата Шиѕуока.

Компанијата во 2014 година го претстави првиот автомобил со ваков вид гориво – „Мира“. Сепак, и покрај неодамнешното издавање на втората генерација, „Мирај“ не е многу баран во Јапонија поради неговата висока цена и недостатокот на развиена мрежа на станици за полнење со водород.

Јапонската Влада на крајот на минатата година го одобри новиот план за намалување на емисиите на штетни гасови, кој меѓу другото, има за цел да го запре производството на сите бензински и дизел-возила до 2030 година. Засегнати се вкупно 14 индустрии и области, како што се домувањето, развој на водородна енергија и др. Според властите, усвоената стратегија треба да ја стимулира економијата на земјата и да создаде позитивен стопански ефект од 750 милијарди евра до 2030 година и скоро 1,5 трилиони евра следните 20 години.