Microsoft за прв пат им нуди на приватните корисници она што досега беше резервирано за деловните корисници, плаќање за проширена поддршка за Windows 10 и по датумот на официјалното „пензионирање“ на ОС.


Microsoft веќе го подготвува теренот за официјално прекинување на поддршката и надградбите за Windows 10, моментално најкористениот десктоп оперативен систем во светот. Речиси три четвртини од сите активни компјутери во светот моментално се на Windows, а речиси две третини од нив сè уште се на Windows 10.

Што по октомври 2025 година?
Уделот на „десетката“ полека паѓа, „единаесетката“ веќе достигна една третина од сите корисници, но следната генерација не продолжува пребрзо. Имајќи предвид дека поддршката за Windows 10 официјално ќе заврши речиси за една година, на 14 октомври 2025 година, лесно може да се види дека со тој ден голем број корисници ќе останат без критичните безбедносни надградби и ќе бидат повеќе изложени на разни закани.

Затоа Microsoft уште еднаш објавува предупредување дека се ближи рокот за транзиција, а деновиве потврди и потег кој досега не беше виден, а за кој почна да се зборува минатата година. Имено, тие за прв пат овозможија да се прошири безбедносната поддршка за стариот оперативен систем и на приватни корисници, а не само на деловни корисници.

Најмногу три години
Програмата Extended Security Updates најпрво беше достапна за сите бизниси, додека сега во неа ќе можат да влезат и приватни корисници на Windows 10 – со плаќање на надомест. Секој што би сакал да продолжи да добива безбедносни ажурирања за Windows 10 по завршувањето на датумот на поддршка, ќе мора да плаќа 30 долари годишно за тоа задоволство. Најдолгиот рок во кој оваа опција ќе биде достапна е три години и ќе вклучува надградби со исправка на пропусти, безбедносни ажурирања и техничка поддршка.

Деловните корисници ќе плаќаат нешто повеќе, од 45 долари по уред нагоре, а цената ќе се зголемува секоја година до октомври 2028 година, кога се планира да престане тој вид на поддршка за Windows 10.

Она што ќе остане достапно за сите корисници на Windows 10, дури и бесплатно, се ажурирањата на Microsoft Defender Antivirus, кои ќе продолжат да се дистрибуираат најмалку до октомври 2028 година.