Првиот јужнокорејски лунарен орбитер беше лансиран минатиот четврток од САД во едногодишна мисија за набљудување на Месечината.


Вселенското летало Данури го носи ракетата Фалкон 9 Спејс Икс. Целта е леталото да стигне до Месечината до средината на декември.

„Ова е многу значајна пресвртница во историјата на корејското вселенско истражување“, рече Ли Санг-рјол, претседател на Корејскиот институт за вселенски истражувања.

Јужна Кореја е посветена на развивање технологија за вселенски патувања и се надеваат дека во иднина ќе можат да испратат вселенско летало на Марс.

За време на едногодишната мисија, Данури ќе користи шест различни инструменти, вклучително и високо чувствителна камера обезбедена од НАСА, за да спроведе истражување, вклучително и истражување на површината на Месечината за да ги идентификува потенцијалните места за слетување за идните мисии.

Еден од инструментите ќе ги оценува вселенските комуникации толерантни на пречки, што, според Министерството за наука на Јужна Кореја, е првата таква технологија во светот.

Данури ќе се обиде да развие безжична интернет-околина за поврзување сателити или истражувачки вселенски летала, а лунарниот орбитер ќе ја емитува песната на K-поп сензацијата BTS – „Dynamite“ за да ја тестира мрежата.

Јужнокорејските научници велат дека Данури, за чија изградба биле потребни седум години, е само дел од поамбициозната цел на нацијата да испрати човек на Месечината до 2030 година.

Доколку оваа мисија успее, Јужна Кореја ќе стане седмата земја во светот која лансира беспилотна сонда на Месечината.

Во јуни, земјата ја лансираше својата прва вселенска ракета од домашно производство.

Во Азија, Кина, Јапонија и Индија се земји со напредни вселенски програми, додека Северна Кореја е последната која се приклучи на редот на земји со можност за лансирање сателити.