Анџелина Џоли за воспитувањето на шесте деца: Горда сум што секое од нив го следи својот пат

Анџелина Џоли проговори за мајчинството и за пристапот со кој ги воспитувала своите шест деца, нагласувајќи дека најважно ѝ било да ги поддржи во градењето сопствена личност и да им остави простор самостојно да го изберат својот животен пат.

Во интервју за магазинот „Л’Офисиел“, објавено на 9 септември, 51-годишната актерка истакна дека е горда на нивната индивидуалност. Џоли е мајка на Медокс, кој има 25 години, Пакс, 22, Захара, 21, Шајло, 20, и 18-годишните близнаци Нокс и Вивиен.

„Една од најважните работи, според мене, е едноставно да не им стоите на патот“, изјави таа, објаснувајќи дека родителската улога подразбира почитување на желбите, способностите и самостојноста на секое дете.

„Како родител се обидувате да направите многу работи, но истовремено се трудите да не му стоите на патот на тоа човечко суштество кое има живот одвоен од вашиот и толку многу потенцијал во сопствениот ум. Сакате да бидете сигурни дека му давате поддршка“, порача Џоли.

Сега, кога сите нејзини деца се полнолетни, актерката размислува и за промени во сопственото секојдневие. Вели дека со нетрпение очекува повеќе патувања, средби со луѓе и непосредна работа на терен.

Таа објасни дека слободното време не го замислува првенствено низ одмори или купување. Повеќе ја привлекуваат нови искуства, поврзување со заедниците и враќање на активности што ја исполнуваат, меѓу кои возењето мотоцикл и пилотирањето.

Според Џоли, нејзините деца целосно ги поддржуваат овие планови. Со доза хумор раскажа дека тие би сакале да им се јавува од места како Тунис, откако ќе слета со авион за да се сретне со локални уметници.

„Ја имаа мама кога требаше да бидам мама“, рече актерката, опишувајќи како сега ја охрабруваат повторно да им посвети повеќе време на сопствените интереси.

Џоли откри и дека сака почесто да престојува надвор од САД и извесен период да води номадски начин на живот. Сепак, сака да задржи семеен дом — место за заедничките спомени, фотографиите и предметите што ги поврзуваат неа и децата.

Меѓу нејзините приоритети е и поголемото лично вклучување во работата на нејзината фондација во Камбоџа, како и продолжувањето на теренските активности.

Актерката ги има шесте деца со поранешниот сопруг Бред Пит. Нивните семејни односи продолжуваат да привлекуваат медиумско внимание, но во новото интервју Џоли го става акцентот на самостојноста на децата и на поддршката што меѓусебно си ја даваат.

Пит, пак, во одделно интервју за „Есквајр“, објавено во август, зборуваше за тежок емотивен период поврзан со семејни прашања. Актерот не навлезе во подробности за приватните околности, а зборуваше и за постепеното закрепнување и прифаќањето на работите што не може да ги контролира.