Бандерас за напуштањето на Холивуд пред 10 години: „Срцевиот удар беше предупредување“

Антонио Бандерас го напушти холивудскиот гламур пред речиси десет години и денес, вели тој, не се кае. Познатиот 65-годишен актер се врати во родната Малага во 2017 година, а потегот беше поттикнат од тежок срцев удар кој, како што самиот вели, целосно му го променил погледот кон животот.

Во интервју за The Times, Бандерас го опиша срцевиот удар како пресвртница.

„Тоа беше навистина сериозно предупредување. Го промени мојот поглед кон животот“, рече тој.

Пред здравствената криза, живеел помеѓу САД и Велика Британија и имал вила во Кобам. По срцевиот удар, веднаш престанал да пуши, го продал својот приватен авион, се вратил во Малага и таму купил театар.

„Кога се соочуваш со смртта, почнуваш да се прашуваш за сè. Тогаш сфатив дека, во суштина, сум театарски актер“, рече тој.

Бандерас сега живее во стан со својата долгогодишна партнерка Никол Кимпел, а е и ко-сопственик на неколку ресторани. Сепак, неговата најголема страст е непрофитниот театар Театро дел Сохо.

„Никогаш не сум бил посреќен“, рече тој.

Тој, исто така, се присети на почетоците на својата кариера во Холивуд и откри дека несигурноста поради тоа што англискиот не му е мајчин јазик исчезнала со текот на времето. Тој вели дека во тоа му помогнал и неговиот брак со Мелани Грифит, со која беше во брак 18 години до нивниот развод во 2015 година.

Бандерас, исто така, се присети дека на почетокот на својата кариера во Холивуд му било кажано дека како Шпанец, најчесто ќе добива улоги на негативци. Тој стереотип го сруши со филмот од 1998 година „Маската на Зоро“.

„Иронијата е во тоа што неколку години подоцна ја носев маската, шапката, мечот и наметката, а негативецот беше Капетан Лав – русокос и синоок“, рече тој.

Додаде дека анимираниот филм од 2011 година „Мачорот во чизми“ е особено важен за него.

„Тој филм ми е важен затоа што е наменет за деца. Тие гледаат мачка со шпански, дури и андалузиски акцент, која е позитивен лик“, рече Бандерас.

фото/Depositphotos