(ВИДЕО) Вештачката интелигенција ќе го промени пазарот на трудот: Експерт тврди дека до 2030 година само пет професии ќе останат безбедни

Вештачката интелигенција со огромна брзина го менува начинот на кој работиме, а сè повеќе технолошки лидери предупредуваат дека многу професии во наредните години ќе исчезнат или драстично ќе се променат. Додека дел од експертите сметаат дека одредени занимања ќе останат релативно безбедни, други прогнозираат многу подраматични промени.

Основачот на Microsoft, Бил Гејтс, неодамна изјави дека програмерите, биолозите и енергетските инженери уште извесен период ќе бидат меѓу професиите кои вештачката интелигенција нема лесно да ги замени. Во гостување кај Џими Фалон додаде дека и професионалните спортисти имаат одредена сигурност.

Сепак, експертот за вештачка интелигенција, д-р Роман Јамполски, смета дека иднината може да биде многу понеизвесна.

До 2027 година можна е општа вештачка интелигенција

Во подкастот „Diary of a CEO“, Јамполски предупреди дека веќе до 2027 година би можела да биде развиена општа вештачка интелигенција (AGI) – систем способен да ги извршува речиси сите интелектуални задачи што денес ги работат луѓето.

Според него, кога ваквите системи ќе се комбинираат со развојот на хуманоидни роботи, побарувачката за човечка работна сила би можела драстично да се намали.

„За пет години и физичката работа може да биде целосно автоматизирана“, предупредува Јамполски.

Тој смета дека светот би можел да се соочи со невидени стапки на невработеност.

„Не зборувам за 10 проценти невработеност, туку за 99 проценти“, изјави тој.

Кои професии би можеле да преживеат?

И покрај песимистичките прогнози, Јамполски смета дека неколку категории работни места сепак ќе останат релевантни.

Првата група се професиите во кои луѓето и понатаму ќе сакаат директен контакт со човек, без разлика колку технологијата ќе напредува. Како пример ги наведува сметководителите. Иако вештачката интелигенција може побрзо и попрецизно да ги извршува пресметките, дел од клиентите и понатаму ќе имаат поголема доверба во човечки експерт.

Како пример го споменува и познатиот инвеститор Ворен Бафет, за кого смета дека би избрал човечки сметководител наместо целосно да се потпре на вештачката интелигенција.

Сепак, нагласува дека ваквата побарувачка ќе биде ограничена и ќе наликува на денешниот пазар за рачно изработени производи.

Човечкото искуство останува незаменливо

Втората група се професиите што бараат разбирање на човечките емоции.

Советници, психотерапевти, психолози и други професионалци кои работат директно со луѓе, според Јамполски, ќе продолжат да имаат важна улога бидејќи можат да понудат нешто што машините не можат целосно да го искусат – човечка емпатија.

„Во свет на суперинтелигенција, единственото што никој не може подобро од вас е да биде – вие“, истакна тој.

Ќе бидат потребни и луѓе што ќе ја контролираат AI

Јамполски верува дека развојот на вештачката интелигенција ќе создаде и сосема нови професии.

Една од нив ќе биде надзорот врз системите на вештачка интелигенција. Овие експерти ќе имаат задача да следат како AI носи одлуки, да поставуваат ограничувања и да обезбедат безбедно и контролирано воведување на новите технологии.

„Во моментов се обидуваме да добиеме повеќе време“, вели тој.

Ќе бидат потребни и „преведувачи“ на вештачката интелигенција

Покрај регулаторите, според неговите проценки, ќе бидат потребни и професионалци кои ќе бидат врска меѓу вештачката интелигенција и корисниците.

Нивната задача ќе биде да објаснуваат како функционираат AI системите, да им помагаат на компаниите при нивната примена и да ја олеснат комуникацијата меѓу технологијата и луѓето.

Иако признава дека неговите прогнози се прилично песимистички, Јамполски смета дека вештачката интелигенција до крајот на оваа деценија може целосно да го промени пазарот на трудот каков што го познаваме денес.