Грчка плажа што изгледа како друга планета стана една од најубавите летни дестинации во Европа

Саракинико Бич, плажата на грчкиот остров Милос, годинава се најде на врвот на листите за најубави и најпосебни плажи во Европа, а фотографиите од ова место веќе со недели доминираат на социјалните мрежи и патничките портали.

Она што ја прави Саракинико поразлична од класичните медитерански плажи е нејзиниот необичен изглед. Белите вулкански карпи, обликувани од ветерот и морето низ илјадници години, создаваат впечаток како да станува збор за „месечев пејзаж“, па многумина велат дека местото повеќе наликува на сцена од научно-фантастичен филм отколку на плажа во Грција.

Комбинацијата од мазни бели карпи и тиркизно сино море последниве години го претвори Милос во една од најпосакуваните летни дестинации меѓу помладите туристи, љубителите на фотографијата и инфлуенсерите на Инстаграм и ТикТок.

За разлика од типичните грчки плажи со лежалки, чадори и гласни beach барови, Саракинико нуди сосема поинакво искуство. Посетителите таму најчесто доаѓаат за да ги истражуваат карпите, да скокаат во кристално чистото море, да нуркаат и да направат фотографии кои изгледаат речиси нереално.

Поради сè поголемата популарност, многумина веќе го нарекуваат Милос „новиот Санторини“, но со помалку гужви и помирна атмосфера. Целиот остров е познат по вулканскиот пејзаж, скриените заливи и повеќе од 70 различни плажи, но токму Саракинико стана негов заштитен знак и една од најпосакуваните летни локации во Европа.

Дополнителен плус за туристите од Македонија е што оваа егзотична дестинација не е далеку и лесно може да стане дел од летниот одмор за оние кои бараат поинакво и незаборавно искуство покрај море.