Мадона откри зошто пропадна долгоочекуваниот биографски филм: Расправија со студиото, Србија и пропаднат договор со Нетфликс

Легендарната поп-ѕвезда Мадона конечно откри зошто нејзиниот долгонајавуван биографски филм никогаш не стигна до големото платно, иако со години беше во подготовка, а главната улога требаше да ја игра актерката Џулија Гарнер.

Во ново интервју за списанието „Interview“, 67-годишната музичка икона призна дека проектот пропаднал поради сериозни несогласувања со филмското студио Universal Pictures околу буџетот.

„Требаше да снимам филм за мојот живот. Работев на сценариото две години и поминав уште две години во Universal со продуценти, буџети и кастинг“, откри Мадона.

Според неа, приказната за нејзиниот живот барала значително поголем буџет од оној што студиото било подготвено да го одобри.

„Мојот живот беше навистина необичен и сакав тоа да се види на екранот. Ми требаше голем буџет, но тие едноставно не можеа да го разберат тоа“, изјави пејачката.

Сакала да снима во Србија

Мадона откри дека во еден момент пронашла начин да го реализира проектот со значително пониски трошоци преку снимање во Србија, но ниту тоа не било прифатливо за студиото.

„Можеби едноставно не веруваа во мене. Еден од нивните први коментари беше дека не веруваат оти би останала во Србија повеќе од четири дена. Им одговорив: ‘Дали воопшто го прочитавте сценариото?’ Целиот мој живот е борба за опстанок, не одам таму на одмор“, рече Мадона.

Нетфликс понудил нова шанса

Откако филмот пропаднал, пејачката останала без јасна насока за проектот, но потоа добила понуда од Нетфликс да ја претвори приказната во ограничена телевизиска серија.

Сепак, се појавил нов проблем.

Мадона не можела да го користи сценариото кое веќе го напишала бидејќи правата останале кај Universal, а за да ги откупи назад требало да плати, како што самата вели, „астрономска цена“.

„Такви се правилата. Почнав да размислувам како би изгледала серијата, но тоа е сосема поинаков процес. Треба да најдете сценаристи, шоуранер и цел тим. Не успеав да го пронајдам вистинскиот човек“, објасни таа.

По уште неколку месеци без напредок, плановите и за серијата биле ставени во мирување.

Џулија Гарнер требаше да ја игра Мадона

Улогата на Мадона во филмот уште во 2022 година ја доби актерката Џулија Гарнер, која беше избрана по напорен процес на аудиции, пејачки и танцувачки проби.

Подоцна, според американските медиуми, меѓу Мадона и студиото се појавиле дополнителни креативни несогласувања. Таа сакала пореалистичен и потемен приказ на својот живот, додека студиото инсистирало на полесен и попристапен пристап.

Тоа довело до целосен застој на проектот.

Наместо филм – нов албум

По неуспешните обиди да го реализира филмот и серијата, Мадона решила целосно да се посвети на музиката.

„Сфатив дека морам да продолжам да создавам. Добро е што имам друга работа, бидејќи едноставно не можам да престанам да работам“, изјави таа.

Во моментов таа се подготвува за објавување на својот 15-ти студиски албум „Confessions II“, кој треба да излезе на 3 јули.

Пејачката откри дека албумот бил инспириран од тежок период во нејзиниот живот, вклучувајќи ги смртта на нејзиниот брат Кристофер Чиконе и маќеата Џоан Чиконе.

„Се чувствував како приказната на албумот и приказната на филмот да се исти – започнуваат со смрт и завршуваат со смрт, но помеѓу има многу живот“, рече Мадона.

Иако проектот засега е стопиран, извори блиски до пејачката тврдат дека таа сè уште не се откажала од идејата еден ден да сними биографски филм за својот живот.