Новата серија „Below“ го освои Нетфликс: За неколку дена собра 17 милиони прегледи

Мистериозниот трилер „Below“, со Џош Хартнет во главната улога, се искачи на првото место на листата на најгледани серии на англиски јазик на Нетфликс. Во неделата од 5 до 11 октомври серијата забележа 17 милиони прегледи, што, според платформата, е најуспешното деби на канадски наслов во нејзината историја.

Приказната е сместена во мало рибарско место на канадскиот остров Њуфаундленд, каде што појавата на непознато морско суштество го нарушува животот на целата заедница.

Хартнет го толкува Калвин, рибар кој се обидува да ги заштити семејството и соседите од опасноста што доаѓа од морето. За да се соочи со заканата, тој ги здружува силите со истражувачка на морскиот свет, која ја игра Мекензи Дејвис.

Во опасност е и неговиот син Вејд, во чија улога настапува Чарли Хитон, познат по ликот на Џонатан Бајерс во „Stranger Things“.

Изолираното крајбрежје, неизвесноста околу потеклото на суштеството и борбата за опстанок ја градат напнатата атмосфера на серијата. Покрај надворешната закана, Калвин го следи и мистериозната смрт на неговиот татко од пред неколку децении.

Дополнително внимание привлече завршницата со неочекуван пресврт. Авторот Џеси Мекјуен и дел од актерската екипа за Нетфликс зборуваа за расплетот и за значењето на последните сцени, кои отвораат нови прашања за приказната.

„Below“ се најде на врвот во недела во која и други нови продукции остварија висока гледаност. Второто место меѓу сериите на англиски јазик го зазеде „East of Eden“, адаптацијата на романот „Источно од рајот“ на Џон Стајнбек, со Флоренс Пју. Во втората недела серијата достигна 12,6 милиони прегледи, речиси двојно повеќе од претходната.

Кај филмовите на англиски јазик предводеше трилерот „Animals“, со 23,8 милиони прегледи. Бен Афлек е режисер, косценарист и главен актер во приказната за политичар чиј син е киднапиран.