По деценија тишина легендите на македонскиот рок повторно заедно: „Меморија“ со голем концерт во „Јане Сандански“

Легендарниот македонски рок-бенд Меморија повторно се враќа на големата сцена и најавува спектакуларен концерт во арената Спортски центар Јане Сандански во Скопје на 23 октомври, настан кој веќе се најавува како едно од најемотивните музички случувања во Македонија оваа година.

По цели десет години од нивното последно заедничко појавување во 2016 година, членовите на „Меморија“ повторно ќе застанат пред публиката со концерт што ќе биде вистинско патување низ историјата на македонскиот рокенрол. Организаторите најавуваат вечер исполнета со емоции, носталгија, антологиски хитови и незаборавна атмосфера што ќе ги обедини сите генерации.

Публиката ќе има можност повторно во живо да ги слушне безвременските песни што оставија силен печат врз македонската музичка сцена, а концертот ќе понуди и ретроспектива на богатата кариера на бендот, проследена со нови музички изненадувања и специјални моменти.

Фронтменот на бендот, Петар Георгиевски – Камиказа, со голема емоција зборува за враќањето на сцената и признава дека долгата пауза само ја засилила желбата повторно да се почувствува енергијата на концертите и контактот со публиката.

Целиот проект добива уште поголема тежина со најавениот документарен серијал од 12 епизоди, во продукција на КЛС и МРТ, кој нема да ја раскажува само приказната на „Меморија“, туку и развојот на македонскиот рокенрол низ децениите. Наратор на серијалот ќе биде легендарниот Игор Џамбазов, кој ќе биде дел и од концертниот спектакл, каде што ќе ја изведе култната „Хотел Македонија“.

Според организаторите, ова нема да биде само концерт, туку вистински музички настан што ќе ги разбуди сеќавањата на неколку генерации кои растеле со музиката на „Меморија“. Најавено е врвно аудио-визуелно доживување, специјална сценографија и вечер исполнета со рокенрол енергија, емоции и заедничко пеење на хитовите што со години се дел од македонската музичка меморија.

Со ова големо враќање, „Меморија“ уште еднаш потврдува дека нивната музика останува безвременска и дека рокенролот во Македонија сè уште има моќ да обединува, инспирира и создава моменти за паметење.