По половина век – нов круг околу Месечината: човештвото се врати таму каде што историјата застана

Четворица астронаути успешно се вратија на Земјата по историската мисија околу Месечината, означувајќи го првото човечко патување до овој небесен објект по повеќе од 50 години.

Капсулата „Орион“, дел од програмата „Артемис II“, безбедно слета во Тихиот океан во близина на брегот на Калифорнија, каде веднаш беа преземени од спасувачките тимови. Мисијата траеше околу 10 дена, а астронаутите се вратија во добра здравствена состојба, потврдија од НАСА.

Екипажот го сочинуваа командантот Рид Вајсман, пилотот Виктор Гловер, како и специјалистите Кристина Кох и Џереми Хансен. Оваа мисија влезе во историјата бидејќи Кох стана првата жена што патувала до Месечината, Гловер првиот астронаут со афроамериканско потекло, а Хансен првиот неамериканец во ваква мисија.

Во текот на летот, „Орион“ помина над 690.000 милји (повеќе од 1,1 милион километри), поставувајќи нов рекорд за најголема оддалеченост од Земјата постигната од човечки екипаж. Астронаутите изведоа обиколка околу Месечината по т.н. „free-return“ траекторија, што им овозможи природно враќање назад без дополнителна погонска сила.

Особено драматичен беше моментот на влегување во атмосферата, кога капсулата се движеше со огромна брзина и беше изложена на екстремни температури. Во тие моменти, комуникацијата со Земјата беше привремено прекината поради плазмата околу леталото, но системите функционираа беспрекорно и слетувањето беше прецизно, опишано како „совршен погодок“.

Мисијата „Артемис II“ претставува клучен чекор во новата ера на вселенски истражувања, со цел повторно враќање на човекот на Месечината и воспоставување долгорочно присуство таму. Успешното завршување на оваа мисија отвора пат за следните фази, кои треба да кулминираат со човечко слетување на Месечината во наредните години.

Со ова, човештвото официјално се враќа во длабоката вселена, продолжувајќи ја мисијата што започна уште во времето на „Аполо“, но сега со нови технологии, поголеми амбиции и визија за идни мисии кон Марс.