Пукна љубовта? Швајнштајгер и Силва наводно раскинале по расправија за вила од 50.000 евра месечно

Љубовната приказна на поранешниот германски фудбалер Бастијан Швајнштајгер и бугарската манекенка Силва Капитанова, која со месеци предизвикуваше внимание во европските медиуми, наводно доживеала неочекуван крај, а сега се појавуваат и нови информации за можните причини за нивното разделување.

Според пишувања на српски таблоиди, причина за прекинот на врската била несогласување околу луксузна вила во Палма де Мајорка, чија месечна кирија, според тврдењата, достигнувала дури 50.000 евра.

Наводно, Швајнштајгер проценил дека трошокот повеќе нема оправданост, особено затоа што во последниот период сè поретко престојувал на шпанскиот остров поради професионалните обврски во Германија и честите патувања.

Извори блиски до поранешниот германски репрезентативец тврдат дека токму одлуката за прекин на изнајмувањето на луксузната хациенда предизвикала сериозни несогласувања меѓу двајцата.

Според истите извори, Капитанова наводно предложила куќата да биде купена и да стане нивна сопственост, но Швајнштајгер не сакал да размислува за таква опција.

Медиумите дополнително пишуваат дека поранешниот фудбалер се обидел да најде компромис, предлагајќи помала и поевтина куќа на Мајорка или преселба во Минхен, но наводно таквите предлози не биле прифатени.

Во меѓувреме, извори тврдат дека Швајнштајгер во текот на врската се обидувал да ги исполнува желбите на својата партнерка, но неговите чести отсуства и обврски сè повеќе влијаеле врз нивниот однос.

Иако приказната веќе предизвика бројни реакции на социјалните мрежи и во спортските и естрадните кругови, засега нема официјална потврда од Бастијан Швајнштајгер ниту од Силва Капитанова.

Во изминатиот период името на Швајнштајгер често се поврзуваше и со шпекулациите околу наводниот крај на неговиот брак со поранешната српска тенисерка Ана Ивановиќ.