Тенорот Нацоски ќе испрати 24 илјади бакнежи на концертот за Денот на вљубените

Македонска филхармонија во сабота, на 13. февруари, од 20 часот ќе го одржи традиционалниот концерт по повод Денот на вљубените, кој годинава е насловен „24 илјади бакнежи“.

Солист на концертот ќе биде тенорот Благој Нацоски, кој доаѓа специјално за овој концерт од Италија, и младата вокалистка Светланата Јовановска. Ќе настапи и хор, а во рамки на концертот ќе има и балетска точка во изведба на Кала Каревски, во кореографија на Саша Ефтимов.

На програмата се љубовни песни, како „Еден бакнеж“, „Beautiful Maria“, „Ne me quitte pas“, а насловот на концертот е извлечен од песната „24.000 baci“ која, исто ќе биде изведена.

„Напишана е во 1961 година од Е.Леони, П.Виварели, Л.Фулчи и А.Челентано. Премиерно била изведена на фестивалот ‘Сан Ремо’ во изведба на Адриано Челентано и Литл Тони и го освоила второто место. Се смета за прва рокенрол песна која влегла во конкуренција за наградата, воедно и за композиција која ја потретира младината во времето на сексуалната револуција“, соопшти Филхармонијата.

 

Концертот ќе го води диригентката Дијана Имери-Илкоска, која дипломираше на Факултетот за музичка уметност во класата на проф. Саша Николовски-Ѓумар, а магистрираше во класата на проф. Борјан Цанев во 2018 година. Таа изјави дека програмата е специјално избрана со дел од најубавите љубовни теми.

„Постарите ќе можат да се вратат во младоста, а помладите да чујат како звучеа љубовните песни во минатото. За мене е особено задоволство да се работи со нашата Филхармонија, како и со одличните солисти Благој Нацоски и Светлана Јовановска со кои заедно, се надевам, ќе успееме да ја пренесеме нашата љубов во ова време во кое љубовта ни е особено потребна“, вели диригентката Имери-Илкоска.

Концертите за Денот на вљубените повеќе години се традиционална содржина на Филхармонијата. Концептуално се различно обликувани од стандардната програма и најчесто имаат популарен карактер.