(ФОТО) „Mr and Mrs“: Дуа Липа ги објави првите фотографии од свадбата која чинеше 1,5 милиони фунти

Поп-ѕвездата Дуа Липа ги објави првите фотографии од својата раскошна свадба со британскиот актер Калум Тарнер, откривајќи дел од атмосферата на тридневната прослава која се одржа на Сицилија и, според странските медиуми, чинела околу 1,5 милиони фунти.

Пејачката (30) и актерот (36) ја крунисале својата љубов во историска вила во близина на Палермо, само неколку дена по граѓанската венчавка во Лондон. Свадбената церемонија била организирана во еден од најлуксузните амбиенти на Медитеранот, а фотографиите што Дуа ги сподели на социјалните мрежи прикажуваат романтични и емотивни моменти од нивниот голем ден.

За свадбата, Дуа Липа избрала ексклузивна венчаница од високата мода на „Шанел“, украсена со илјадници перли, со отворен грб и долг вел. Калум Тарнер, пак, носел елегантно одело од „Луј Витон“. Фотографиите, направени од познат моден фотограф, ги доловуваат подготовките, интимните моменти и атмосферата во раскошните градини на вилата.

Пејачката ги објави фотографиите со кратката, но моќна порака: „Mr and Mrs“.

Прославата траела до раните утрински часови, а кулминирала со десетминутен огномет кој го осветлил небото над Сицилија. На свадбата присуствувале околу 150 гости, меѓу кои членови на семејствата, блиски пријатели, како и неколку светски познати имиња од музичката и модната индустрија.

Посебен момент од вечерта бил посветен на албанските корени на Дуа Липа, преку традиционална музика и танци кои внеле дополнителна емоција и автентичност во прославата.

Гостите уживале во коктели на терасата на вилата, по што следела свечена вечера со внимателно избрано мени составено од традиционални сицилијански специјалитети подготвени од реномиран готвач. За десерт биле послужени познатите каноли и касата, едни од најпрепознатливите слатки специјалитети на Сицилија.

По свадбената церемонија, младенците заминале на двонеделно патување низ Италија, а биле забележани и во луксузен хотел во Таормина.

Дуа Липа и Калум Тарнер се запознале во 2024 година во Лос Анџелес, а по речиси две години врска одлучиле да стапат во брак и официјално да ја започнат својата заедничка животна приказна.