Шерон Стоун проговори за визијата на работ на смртта: „Не знаев дали треба да останам или да умрам“

Холивудската актерка Шерон Стоун откри детали за необичното искуство што го доживеала по мозочниот удар во 2001 година и за кое молчела повеќе од две децении.

Ѕвездата на филмовите „Основен инстинкт“ и „Казино“, која денес има 68 години, раскажала дека во периодот на закрепнување ѝ се појавиле пет светлечки топки што, според нејзиното доживување, комуницирале со неа.

Стоун за искуството зборувала во поткастот „Mayim Bialik’s Breakdown“, а делови од разговорот ги објави Entertainment Weekly.

По болницата не можела да спие ноќе

Актерката се присетила дека по враќањето од болница целосно ѝ бил нарушен ритамот на спиење. Ноќе останувала будна, а најголем дел од денот го поминувала одморајќи се.

Еден ден, додека лежела на каучот во состојба помеѓу сон и будност, пред неа се појавиле пет необични светлечки облици.

Според Стоун, тие комуницирале со неа на начин што таа го опишала како „дигитален јазик“. Иако сцената звучи застрашувачки, актерката тврди дека во тој момент не чувствувала страв, туку љубопитност и необичен спокој.

Верувала дека добила предупредување за својот син

Стоун вели дека за време на необичното искуство почувствувала дека ќе биде разделена од својот најстар син Роан, кој тогаш имал само една година.

Таа и нејзиниот поранешен сопруг, новинарот и уредник Фил Бронштајн, го посвоиле Роан во 2000 година.

Актерката раскажала дека на светлечките облици им кажала оти не знае дали треба да продолжи да живее или да умре. Според нејзиното сведоштво, добила порака дека треба да остане жива.

Таа, наводно, одговорила дека ќе остане само доколку две од светлечките суштества останат покрај нејзиниот син, бидејќи стравувала дека детето ќе ѝ биде одземено и дека ќе остане само.

Неколку години подоцна го изгубила старателството

По разводот од Бронштајн во 2004 година следувала долга и медиумски следена судска битка за старателството над Роан. Стоун на крајот го изгубила примарното старателство над синот.

Актерката подоцна тврдеше дека врз судската одлука влијаеле и предрасудите поврзани со нејзиниот провокативен филмски имиџ, особено со улогата во „Основен инстинкт“.

Стоун раскажала дека по разделбата од синот повторно мисловно им се обратила на светлечките ентитети и побарала од нив да го чуваат и заштитуваат.

Според нејзиното сведоштво, тие се согласиле, но ѝ пренеле дека нивната улога била да останат и покрај неа поради нејзината животна судбина.

Денес повторно е блиска со Роан

И покрај болниот развод и борбата за старателство, Стоун и нејзиниот син со текот на времето повторно изградиле близок однос. Роан денес има 26 години.

Актерката подоцна самостојно посвоила уште два сина – Лерд, кој денес има 21 година, и Квин, кој има 20 години.

Стоун истакнала дека искуството со светлечките топки не го доживеала како закана. Напротив, вели дека била смирена и љубопитна, но со години не зборувала за него бидејќи не знаела како да го објасни.

Актерката не понудила научно објаснување за визијата, туку ја претставила како лично доживување од периодот на закрепнување по мозочниот удар што сериозно ѝ го загрозил животот.