Шокантно признание на Ен Хатавеј: Десет години живеела речиси слепа на едното око

Холивудската актерка Ен Хатавеј откри досега непозната и шокантна здравствена битка што ја водела речиси цела една деценија. За време на гостувањето во поткастот „Popcast“ на „The New York Times“, 43-годишната ѕвезда призна дека во текот на целите свои триесетти години била речиси правно слепа на едното око поради рано развиена катаракта.

Актерката, која светската публика ја познава по улогите во „Ѓаволот носи Прада“, „Les Misérables“ и бројни други филмски хитови, искрено раскажа дека долго време не сфаќала колку сериозно нејзината состојба влијаела врз секојдневниот живот.

„Можеби ова е премногу информации, но половина бев слепа десет години“, изјавила Хатавеј.

Таа објаснила дека катарактата толку сериозно го оштетила нејзиниот вид што практично била правно слепа на левото око, по што на крајот морала да се подложи на хируршка интервенција.

„Видот ми беше толку погоден што не сфаќав колку работите се влошиле сè додека конечно повторно не можев да го видам целиот спектар на бои и детали“, рекла актерката.

Хатавеј признала дека дури по операцијата сфатила колкав физички и психолошки товар носела состојбата.

„Сега сум многу помирна. Не сфаќав дека тоа всушност го оптоварувало и мојот нервен систем“, открила таа.

Според медицинските објаснувања, катарактата претставува заматување на природната леќа на окото, што постепено доведува до замаглен вид. Специјалистите ја споредуваат оваа состојба со гледање низ замрзнат или замаглен прозорец. Таквата состојба може да предизвика проблеми при читање, ноќно возење или дури и препознавање лица.

Актерката денес вели дека можноста повторно нормално да гледа ја доживува како вистинско чудо.

„Секој ден кога ќе се разбудам и ќе можам да гледам вака како што гледам денес, за мене е чудо. Пред две генерации наназад, луѓе со ваков проблем немале можност за ваков третман“, изјавила Хатавеј.

Во истото интервју таа се осврнала и на неодамнешните шпекулации на социјалните мрежи поврзани со пластични операции. Актерката демантираше дека направила естетски зафати, нагласувајќи дека луѓето често носат заклучоци без вистински информации.

„Шпекулациите станаа толку гласни што почувствував потреба да ја кажам вистината. Не донесов голема медицинска одлука – тоа беа само две плетенки“, се пошегувала таа.

Сепак, таа додала дека не ја исклучува можноста во иднина евентуално да направи естетска корекција, признавајќи: „Можеби еден ден сепак ќе направам лифтинг.“