Ќерката на Том Круз официјално се откажа од неговото презиме: Започнува ново животно поглавје

Сури, ќерката на холивудските актери Том Круз и Кејти Холмс, официјално повеќе не го носи презимето Круз. Според јавните записи, 20-годишната студентка сега е заведена под името Сури Ноел, преземајќи го средното име на својата мајка како свое ново презиме.

Промената станала официјална откако Сури се регистрирала за гласање под новото име, со што и формално ставила крај на користењето на презимето на својот татко.

Одлуката не доаѓа неочекувано. Уште минатата година, за време на церемонијата на дипломирање, таа се претстави како Сури Ноел, што тогаш беше првиот јавен знак дека планира трајно да го промени своето презиме.

По разводот на Том Круз и Кејти Холмс во 2012 година, Сури порасна со својата мајка. Со години медиумите пишуваат дека таа и Том Круз немаат близок однос, а актерот не бил виден во нејзино друштво уште од периодот по разводот. Сепак, ниту Том Круз, ниту Сури или Кејти Холмс јавно не ги коментирале причините за нивното отуѓување.

Одлуката на младата студентка привлече големо внимание во јавноста, бидејќи многумина ја толкуваат како симболичен чекор кон градење сопствен идентитет, независен од славното презиме на нејзиниот татко.

Сури Ноел моментално студира музички театар на Универзитетот „Карнеги Мелон“ и, иако е ќерка на едни од најпознатите холивудски ѕвезди, настојува да води мирен живот и во најголем дел да остане надвор од медиумското внимание.