Аријана Гранде по завршувањето на турнејата се повлекува од јавноста: Позната е причината за неочекуваната одлука

По неколку месеци исполнети со концерти, јавни настапи и постојан медиумски притисок, светската поп-ѕвезда Аријана Гранде одлучи привремено да се повлече од јавниот живот. Пејачката ќе направи пауза веднаш по завршувањето на својата светска турнеја „Eternal Sunshine“, која завршува на 1 септември со концерт во Лондон.

Според магазинот „People“, одлуката доаѓа по долг период во кој Гранде беше под постојано внимание на јавноста, особено поради честите коментари за нејзиниот физички изглед и здравствената состојба.

Нејзин претставник потврдил дека по финалниот концерт пејачката ќе се повлече од јавните настапи и ќе си дозволи заслужен одмор.

„Аријана ќе се повлече од јавноста по завршувањето на турнејата. Таа со нетрпение очекува да ја заврши турнејата на најдобар можен начин – здрава и среќна – а потоа ќе следува заслужен одмор од јавните настапи и појавувања, кои во изминатиот период беа проследени со постојан и интензивен јавен надзор“, изјавил нејзиниот претставник.

Интензивната турнеја го оставила својот белег

Извор близок до пејачката открива дека турнејата е исклучително физички напорна и бара огромна кондиција.

„Станува збор за многу физички захтевно шоу. Аријана настапува на највисоко ниво од вечер во вечер, а тоа бара голема издржливост и максимална посветеност“, изјавил изворот.

Поради потребата од одмор, Гранде донела одлука да се повлече од дел од идните професионални ангажмани.

Се откажува и од улога во мјузикл

Според истите извори, пејачката нема да учествува во обновената лондонска продукција на мјузиклот „Sunday in the Park with George“, која следното лето треба да биде поставена во „Barbican Centre“.

Во претставата требало да настапи заедно со својот колега од филмот „Wicked“, Џонатан Бејли.

Иако нема да биде дел од проектот, блиски извори велат дека Аријана со нетрпение очекува да ја поддржи актерската екипа и продукцијата.

Постојаните коментари за нејзиниот изглед ја следат со години

Во последните неколку години Аријана Гранде често е тема на јавни дебати поради нејзиниот изглед и здравје, а интересот дополнително се зголеми по објавувањето на видеоспотот за песната „Petal“, од истоимениот албум објавен на 31 јули.

Пејачката и претходно јавно реагираше на коментарите за своето тело. Во песната „Yes, And?“ испрати јасна порака до јавноста:

„Не го коментирајте моето тело… вашиот живот е ваш, а мојот е мој.“

Новиот албум носи силна лична порака

Според луѓе блиски до пејачката, новиот албум претставува многу личен проект и е опишан како своевидна химна за сложениот однос меѓу јавните личности и јавноста.

Изворите наведуваат дека албумот не е посветен на љубовни врски или раскинувања, туку зборува за љубовта и омразата што славните личности често ја доживуваат од јавноста, како и за токсичноста на постојаниот медиумски и јавен притисок.

По завршувањето на турнејата, Аријана Гранде планира целосно да се посвети на одмор, далеку од камерите и јавните настапи, со цел да ги обнови силите по еден од најинтензивните периоди во својата кариера.