Арнолд Шварценегер имал операција на срцето

Холивудската ѕвезда и некогашен гувернер на Калифорнија, Арнолд Шварценегер, преку „Твитер“ откри дека пред неколку дена имал операција на срцето, но сега се чувствува фантастично. 73-годишниот глумец објави слика од болничкиот кревет од клиника во Кливленд и им се заблагодари на вработените во болницата што се грижеле за него.

„Имам нов аортен залисток заедно со мојот нов белодробен залисток од претходната операција. Се чувствувам фантастично и веќе шетам по улиците на Кливленд, и можам да се сликам со вашите интересни споменици“, напиша тој покрај сликите што ги објави на „Твитер“.

Актерот, кој е роден со срцева мана, беше подложен на итна операција на отворено срце во 2018 година, кога му беше заменет залистокот.

Шварценегер се прослави во 80-тите години од минатиот век со улогите во акциони филмови како „Терминатор“ и „Конан Варваринот“, но и во комедии. Во 2003 година, тој беше избран за гувернер на Калифорнија. По крајот на мандатот во 2011 година, тој се врати на филмовите, и се појави во „Платеници 2“ и во продолжението на „Терминатор“.

Thanks to the team at the Cleveland Clinic, I have a new aortic valve to go along with my new pulmonary valve from my last surgery. I feel fantastic and have already been walking the streets of Cleveland enjoying your amazing statues. Thank you to every doc and nurse on my team! pic.twitter.com/hmIbsEMHtA

— Arnold (@Schwarzenegger) October 23, 2020