„А1он“, „Макфакс“, „Репортер“, „Додај гас“, УСБ и „Топ спорт“ излегуваат од Time.mk

Порталите од „Клип медија груп“ – „А1он“, „Макфакс“, „Репортер“, „Топ спорт“, УСБ и „Додај гас“ – излегуваат од Time.mk и повеќе нема да можe нивните содржини да се најдат на овој агрегатор на вести. Причините за ваквиот чекор се повеќе, но најбитната е дека ниту еден агрегатор на вести не може да се однесува како сака со креаторите на содржини од кои тој зависи и заработува.

Како агрегатор на вести, кој заработува илјадници евра годишно благодарение на посетите остварени на содржини на други медиуми, не смее да си дозволи да ги обојува и да им одредува политичка припадност. Сопственикот на овој агрегатор на вести, иако ниту е стручен за тоа ниту е новинар, си ги подреди во сина и црвена боја сите медиуми како блиски до некоја политичка опција, а некои имаа среќа да ги одреди во исто време и како неутрални. Ваквите обиди да ги класифицира медиумите ние нема да ја премолчиме, ниту некому ќе му ја дозволиме, а особено не некому што не е стручен за тоа.

Второ, цело време постои неоправдано форсирање портали на пријатели, кои не исполнуваат услови ниту да се најдат на агрегаторот на вести, односно да имаат 300.000 посети месечно, а истовремено вештачки се спуштаат други медиуми иако објавиле први информација и имаат десет пати поголем број посети од потребните за да бидат на овој агрегатор на вести.

Трето, со уценувачки речник се бараше продолжување на соработката, која ние секако ја одбиваме и понатаму не сакаме нашите медиуми да се наоѓаат на Time.mk, ниту да му даваме моќ, која реално и ја нема. Интернет-медиумите во склоп на „Клип медија“ се со сите стандарди –  транспарентно истакнати редакции, докажани новинарски имиња, регулуиран статус на сите вработени, контакт во секое време, маркетинг -служба, лектори, сниматели, монтажери, правна служба и, најбитно, со многу посети. Затоа не дозволуваме никој да ни диктира услови. Истовремено, ќе биде испратено и упатство за употреба на содржини во сопственост на Групацијата Клип медија груп до Time.mk, односно секаква содржина што ќе биде пронајдена на агрегаторот на вести, без разлика во каков облик, ќе биде цел на тужба од страна на нашата правна служба и ќе биде наплаќана според ценовникот достапен на секој портал на „Клип медија груп“.

Нашите читатели ги упатуваме дека вестите што се на „А1он“, „Макфакс“, „Репортер“, „Топ спорт“, УСБ и на „Додај гас“ ќе може да ги читаат директно на нашите портали, но и на другите агрегатори.