(Видео) Босански фудбалер донираше црн дроб на мајка си за да ѝ го спаси животот

Фудбалерот на Босна и Херцеговина, Роберт Периќ Комшиќ ѝ го спаси животот на мајка му донирајќи ѝ црн дроб. 23 годишниот спортист иако ја ризикува кариерата, рече дека не размислувал и дека одма се одлучил да ѝ биде донор.

Мајка му претходно имала три неуспешни трансплантации, а лекарите му рекле дека не ѝ останало уште многу време живот. Сите други опции се покажале како ризични, па Комшиќ отпатува во Турција за да ѝ помогне.

„Во оваа приказна, мајка ми е поголем херој од мене. Не му го посакувам на никого она што таа го преживеа изминатите 13 години. Имаше три неуспешни трансплантации на црн дроб од починат донор. Ризикот беше голем, а времето истекуваше. Беше во животна опасност и беа во прашање денови. Кога дознав дека сите други опции се исцрпени одма летнав за Истанбул. Мајка ми мора да прима терапија, но тоа не е за неа никаква новост, затоа што со години е под лекови. Мене сите резултати ми се уредни, црниот дроб два месеци по операцијата беше целосно регенериран. Ги избегнувам приказните дека сум херој. Го направив она што би го направи секој. Мене мајка ми ми даде живот, а јас ѝ го продолжив нејзиниот“, рече Роберт.