ВИДЕО | Го преживеал разорниот цунами во Тајланд: „Бунгаловот почна да се тресе, а следниот миг бев во водата“

Ендру Чагар имал 27 години кога со партнерката Нова тргнал на едногодишно патување околу светот. На 26 декември 2004 година, нивната авантура се претворила во борба за живот, откако разорниот цунами го погодил тајландското одморалиште Као Лак, каде што престојувале во бунгалов на само триесетина метри од плажата.

Во сведоштво за „ЛАДбајбл“, Чагар раскажал дека го разбудиле силни вибрации и бучава што го потсетувала на млазен мотор пред полетување. Нова веќе била будна и стоела покрај креветот, обидувајќи се да разбере што се случува.

„Бунгаловот почна да се тресе, а тресењето стануваше сè посилно“, се присетил тој.

Поради распоредот на објектите, од собата немале поглед кон морето и не можеле да го видат бранот што се приближувал. Времето за реакција било речиси непостоечко.

„Имав доволно време само да станам од креветот кога првиот бран удри во крајот од редот бунгалови. Едноставно ги урна како домино“, раскажал Чагар.

Нивниот бунгалов бил трет или четврти во низата. Следното нешто на кое се сеќава е дека се нашол во вода, опкружен со остатоци од разрушените објекти.

Силата на струјата била толкава што не можел да плива против неа, ниту да го контролира правецот во кој се движел.

„Беше речиси како да сум во машина за перење полна со шајки“, го опишал искуството. Водата носела метал, стакло, тули и други предмети што дополнително ја зголемувале опасноста.

Според неговото сведоштво, струјата го однела до градилиште на хотел, каде што левата нога му се заглавила покрај бетонски столб. Иако претрпел тешка повреда, денес верува дека токму таа пречка му го спасила животот, спречувајќи водата да го однесе понатаму кон морето.

На градилиштето останал приближно четири часа, пред да го пронајдат двајца мажи и да му помогнат да се спушти. Спасувањето се одвивало во страв од нов бран, откако некој во близина извикал предупредување.

За Чагар, извлекувањето од урнатините не значело крај на неизвесноста. Не знаел што се случило со Нова, со која само неколку часа претходно бил во бунгаловот.

Приближно шест месеци подоцна, полицијата го известила дека таа загинала. Според неговото раскажување, при идентификацијата биле користени забни податоци и фотографија од ѓердан што го препознал како нејзин.

По катастрофата, Чагар го насочил својот живот кон хуманитарната работа. Ја основал организацијата „International Disaster Volunteers“, која ја водел десет години, помагајќи им на заедници погодени од катастрофи.

Цунамито во Индискиот Океан од 26 декември 2004 година однесе приближно 230.000 животи, според податоците на Британскиот Црвен крст наведени во извештајот. Меѓу најтешко погодените земји беа Индонезија, Шри Ланка, Индија и Тајланд.