(ВИДЕО) По 32 години на сцена, Суперхикс пред уникатна мисија: Да свират во секој град во Македонија

Македонските ска-панк легенди Суперхикс, по повеќе од три децении активна кариера, стотици концерти и генерации публика што растеше со нивните песни, се пред уште еден симболичен предизвик – да станат еден од ретките бендови што одржале концерт во секој град во Македонија.

Фронтменот Петар Младеновски – Пеце преку видео-објава на социјалните мрежи упати апел до фановите, пријателите, организаторите и сите љубители на музиката да помогнат оваа мисија конечно да се заокружи.

„Апел. Молба. Барање. Поддршка! Сакаме да ги ‘отсвириме’ последните 4 града во Македонија кои не сме успеале да ги ‘отсвириме’ за овие 32 години активност на Суперхикс. Благодариме!“, напиша Пеце во објавата.

Повод за ова откритие било подготвувањето на монографијата за Суперхикс, на која бендот работи заедно со музичкиот хроничар Тошо Филиповски. При прегледувањето на концертната архива од изминатите 32 години, дошле до изненадувачки податок дека, и покрај бројните настапи низ земјата, никогаш не свиреле во Делчево, Пехчево, Македонски Брод и Демир Капија.

Добрата вест е дека мисијата веќе започнала. За Делчево е договорен концерт кој треба да се одржи во август годинава, со што листата на градови во кои Суперхикс никогаш не настапиле ќе се намали на само три.

Од бендот сега бараат поддршка за да се организираат концерти и во Пехчево, Македонски Брод и Демир Капија. Апелот е упатен до општини, домови на култура, локални организатори, фестивали, но и до сите поединци што можат да помогнат оваа приказна да добие среќен крај.

Иницијативата доаѓа кратко по уште еден голем јубилеј – 300-тиот концерт на Суперхикс во Македонија, кој беше одржан во Битола. Тоа е уште една потврда за статусот на бендот како еден од најенергичните, најдолговечните и највлијателните состави на македонската музичка сцена.

Доколку апелот стигне до вистинските луѓе, Суперхикс наскоро би можеле да испишат уште едно важно поглавје во својата историја. По 32 години, стотици концерти и три децении бескомпромисна енергија, бендот би можел конечно да каже дека ја исполнил својата мисија – да свири во секој град во Македонија.

Можеби токму ова е најубавиот начин една концертна приказна, започната пред повеќе од три децении, да стане комплетна.