Вирусот Западен Нил се шири во регионот: Случаи регистрирани и во Македонија, зголемено внимание поради комарците

Во повеќе европски земји се регистрираат случаи на инфекција со вирусот Западен Нил, болест што се пренесува преку убод од заразен комарец. Меѓу земјите за кои се посочува зголемено внимание се Италија, Грција, Романија и Северна Македонија.

Предупредување за своите граѓани издаде и германското Министерство за надворешни работи, кое ги советува патниците што престојуваат во овие земји да применуваат дополнителни мерки за заштита од комарци, особено во текот на летните месеци.

Според податоците наведени во предупредувањата, во Италија досега се потврдени 21 случај на инфекција со вирусот Западен Нил во 17 региони. Во Грција, исто така, се регистрирани 21 случај од почетокот на годината, при што 14 од нив биле пријавени во текот на последната недела.

Први случаи за годинава се потврдени и во Романија и во Северна Македонија, што дополнително го насочува вниманието кон заштитата од комарци во периодот кога нивната активност е најголема.

Најголем ризик во летните месеци

Вирусот Западен Нил природно циркулира меѓу птиците и комарците. Луѓето најчесто се инфицираат преку убод од комарец кој претходно го добил вирусот од заразена птица.

Ризикот е особено изразен од јули до септември, кога условите се најповолни за активност и размножување на комарците.

Германското Министерство за надворешни работи предупредува дека вирусот сезонски се појавува во повеќе европски земји, а особено внимание им се препорачува на туристите кои летуваат во Италија и Грција.

За патниците во Романија се препорачува доследна заштита од убоди од комарци од пролет до есен, додека за Северна Македонија се советува зголемено внимание во текот на летото.

Како да се заштитите?

Основната мерка за превенција е спречување на убоди од комарци. Се препорачува употреба на соодветни репеленти и носење облека што покрива поголем дел од телото, особено во периодите кога комарците се најактивни.

Дополнителна заштита обезбедуваат мрежите на прозорците и вратите и престојот во простории заштитени од комарци. Посебно внимание е потребно во вечерните часови и во близина на места погодни за размножување на комарците.

Повеќето заразени немаат никакви симптоми

Според германскиот Институт „Роберт Кох“, најголемиот дел од лицата заразени со вирусот Западен Нил воопшто не развиваат симптоми.

Кај приближно еден од пет заразени може да се појават симптоми слични на грип, меѓу кои покачена телесна температура, главоболка, болки во мускулите и изразен замор.

Кај мал дел од инфицираните, сепак, болеста може да добие потешка форма и да го зафати нервниот систем. Можни се сериозни компликации, меѓу кои енцефалитис – воспаление на мозокот, или менингитис – воспаление на мозочните обвивки.

Кој е изложен на најголем ризик?

Поголем ризик од развој на сериозна форма на заболувањето имаат повозрасните лица, луѓето со ослабен имунолошки систем и пациентите со одредени хронични заболувања.

И покрај тоа што тешките форми се ретки, здравствените власти предупредуваат симптомите да не се игнорираат, особено доколку се појават по повеќекратни убоди од комарци во подрачје каде што е регистрирана циркулација на вирусот.

Нема вакцина за луѓето

Во моментов не постои регистрирана вакцина против вирусот Западен Нил наменета за луѓе, ниту специфичен антивирусен лек за инфекцијата.

Токму затоа превенцијата останува најважната форма на заштита. Употребата на репеленти, соодветната облека и намалувањето на изложеноста на комарци се наједноставните мерки со кои може значително да се намали ризикот од инфекција.

Со оглед на летната сезона и зголемената активност на комарците, вниманието е особено важно за граѓаните кои престојуваат во природа, но и за оние кои патуваат во земјите каде што веќе се регистрирани случаи на вирусот Западен Нил.