Данската кралица се зарази со ковид на погребот на Елизабета Втора

Данската кралица Маргарет Втора во понеделникот се зарази со коронавирус на погребот на британската кралица Елизабета Втора во Лондон. Следниот ден направила тест кој бил позитивен на ковид. Ова е вторпат како се заразува со вирусот годинава.

Во вторникот ги откажа сите обврски за неделава. По смртта на Елизабета, сега таа е кралицата со најдолг стаж во Европа. Во јануари одбележа 50 годишнина од владеењето со скромна прослава поради пандемијата со ковид.

Големата свечена прослава беше одложена за вториот викенд во септември, но програмата сепак беше променета во последен момент на нејзино барање поради смртта на Елизабета Втора. Повеќето нејзини јавни настапи, вклучително и парадата низ улиците на Копенхаген, беа откажани.

За потсетување, Маргарет дојде на тронот во 1972 година кога поддршката за данското кралско семејство беше во опаѓање, но за време на нејзиното долго владеење помогна да се врати неговата репутација.

„Ја обедини данската нација во време на големи промени, глобализација, појава на мултикултурна држава, економски кризи во 1970-тите, 1980-тите и повторно од 2008 до 2015 година и тоа во пандемијата – рече историчарот Ларс Ховебаке Соренсен за АФП.

Позната како Дејзи меѓу нејзиното семејство и поданиците, таа беше братучедка на Елизабета Втора од трето колено. И двете беа потомци на кралицата Викторија. Сопругот и почина во 2018 година, но, таа инсистираше и покрај загубата да не се повлече од власта.

„Ќе останам на престолот додека не се срушам“, рече таа.

Маргарета е вакцинирана против Ковид и последен пат беше позитивна во февруари годинава, кога имаше благи симптоми. Нејзиниот портпарол рече дека ќе се одмора во палатата Фреденсборг, северно од Копенхаген.