Дизелот поевтинува за 2,5 денари, бензините за 1,5 – нови цени на горивата од полноќ

Цените на горивата во Македонија од ноќеска на полноќ се намалуваат, откако Регулаторната комисија за енергетика донесе одлука за пониски максимални цени. Дизелот поевтинува за 2,5 денари по литар, додека бензините ќе бидат поевтини за 1,5 денари, што значи просечно намалување од околу 2,73 проценти.

Според новата одлука, максималните цени од 15 април ќе изнесуваат: бензинот Еуросупер БС-95 ќе се продава за 82 денари по литар, Еуросупер БС-98 за 84 денари, додека дизел горивото Еуродизел ќе чини 95,5 денари за литар. Маслото за горење Екстра лесно ќе се продава по 96,5 денари за литар, а мазутот ќе изнесува 49,227 денари за килограм.

Сепак, овие цени не го вклучуваат дополнителниот попуст од Окта, кој за трговците изнесува 3 денари по литар за дизелот и 2 денари за бензините. Со вклучени попусти, реалните цени што ќе ги плаќаат граѓаните ќе бидат уште пониски.

Така, дизелот на бензинските пумпи ќе се продава по околу 92,5 денари за литар, наместо досегашните 95 денари. Бензинот Еуросупер БС-95 ќе падне на околу 80 денари, а Еуросупер БС-98 на 82 денари за литар.

Ова значи дека намалувањето директно ќе се почувствува кај граѓаните и компаниите, особено во транспортниот сектор, каде дизелот има клучна улога.
Во меѓувреме, иако беа најавени нови мерки за заштита на стандардот, особено во делот на цените на храната, од Владата засега порачуваат дека ситуацијата сè уште се анализира. Според најавите, ќе се разгледува извештајот на пазарните инспектори, по што евентуално ќе се донесат таргетирани мерки.

Засега, фокусот останува на следење на пазарот, додека граѓаните ќе добијат барем краткорочно олеснување преку пониските цени на горивата, кои директно влијаат врз секојдневните трошоци.