Емотивен момент во авион:Принцот Хари утеши патничка со три збора што ја расплакаа

Несекојдневна и трогателна сцена се случила на лет од Сиднеј кон САД, кога принцот Хари ѝ пружил утеха на патничка која патувала дома по смртта на својата баба.

Џастин Паркхерст, која летала кон Северна Каролина по погребот на својата баба, признала дека не можела да ги задржи солзите веднаш по качувањето во авионот. Токму тогаш, без да очекува, покрај неа седнал принцот Хари.

Во краткиот разговор, таа му кажала дека единствената личност со која сакала да ја сподели веста дека седи до член на кралското семејство е нејзината баба. Одговорот на Хари бил едноставен, но длабоко емотивен: „Таа веќе знае.“

Овој краток момент оставил силен впечаток кај Паркхерст, која подоцна споделила дека токму тие три зборови ѝ донеле утеха во најтешкиот момент.

Интересно е што целата ситуација се случила по случајна промена на плановите. Паркхерст и нејзиниот сопруг првично требало да патуваат еден ден порано, но во последен момент го смениле летот и добиле надградба во прва класа – токму во делот каде што седеле принцот Хари и Меган Маркл, кои се враќале од четиридневна посета на Австралија.

Паркхерст вели дека на почетокот дури и не забележала кој седи до неа, бидејќи била премногу потресена. Дури кога се смирила, сфатила дека до неа е војводата од Сасекс.

Таа опишува дека и Хари и Меган биле љубезни и пристапни кон сите патници, а и покрај присуството на обезбедување, атмосферата во авионот била опуштена.

За неа, ова патување кое започнало со тага, на крајот добило поинакво значење.

„Верувам дека тој е во право. Сигурно мојата баба го организирала сето ова“, напишала таа, сумирајќи го искуството кое никогаш нема да го заборави.