Концерт на легендарниот дрон метал бенд САН во МКЦ

Вечерва, во ЈУ Младински културен центар во организација на издавачката куќа “Фак Јога/Милинтант ЗаЗа” ќе се одржи концерт на легендарниот американски дрон-метал состав “SUNN O)))”, едни од највлијателните и најекстремни по звук музички состави на нашето време.

Стивен О’Мали и Грег Андерсон, двоецот што стои зад оваа звучна алхемија, пристигнуваат во Скопје како дел од европската турнеја „Shoshin Duo“, која оваа есен ги носи низ Белград, Загреб, Софија и други градови. Нивната музика не е само концерт – тоа е телесно искуство, вели организаторот.

„Познати по своите моќни звучни ѕидови, бавни и тешки фреквенции, и ритуалната магла што ја обвива публиката, SUNN O))) создаваат атмосфера која истовремено е медитативна и застрашувачка. Настапите им се дел од уметничка изведба каде што гласноста не е само сила, туку форма на комуникација – вибрација која се чувствува во коските и градите.

За љубителите на авангардата, на експерименталниот звук и на границите на можноста на музиката, ова е вечер што ќе се памети. МКЦ ќе биде исполнет со густ, длабок звук и светлина што ќе го претвори просторот во звучен облак“.