Кралот има рак – Reporter.mk

На кралот Чарлс му е дијагностициран облик на рак, соопшти Бакингемската палата.

Тие не прецизираа за каков вид на рак се работи.

Бакингемската палата објави дека кралот денеска почнал со редовни третмани. Тие додадоа дека кралот „останува целосно позитивен во однос на неговото лечење и со нетрпение очекува да се врати на целосна јавна должност што е можно поскоро“.

„Неговото височество одлучи да ја сподели својата дијагноза за да спречи шпекулации и со надеж дека ќе помогне во разбирањето на јавноста за оние ширум светот погодени од рак“, истакнаа тие.

Кралот утрово отпатува во Лондон за да почне со лекување. Тој ќе ги одложи јавните настапи, како што го советувале неговите лекари.

Се очекува и другите членови на кралското семејство да му помагаат во неговите должности. Иако извесно време нема да се појавува во јавноста, 75-годишникот ќе продолжи да ја извршува уставната улога на шеф на државата.

Кралот лично ги известил двата сина за неговата дијагноза. Принцот Хари, кој живее во САД, разговарал со својот татко и во наредните денови ќе отпатува за Велика Британија за да го види.

Инаку, Чарлс последен пат беше виден во јавноста вчера, на миса во Сандрингем. Пред повеќе од една недела тој беше опериран на простатата во приватна болница во Лондон. Кралот одлучил да излезе во јавноста за лекувањето на простатата со цел да поттикне повеќе мажи да се проверат, објави тогаш палатата.

Набргу по објавувањето на веста дека кралот е болен, се огласи британскиот премиер Риши Сунак.

„Му посакувам на неговото височество целосно и брзо закрепнување. Не се сомневам дека брзо ќе се врати во полна сила и знам дека целата земја ќе му посака најдобро“, рече тој.