Македонскиот филм „Љубовна соба“ ќе се прикажува на фестивали во Амстердам и Лајпциг

Долгометражниот документарен филм „Љубовната соба“ на режисерката Сузана Диневски ќе се прикажува на Меѓународниот фестивал за документарни и анимирани филмови во Лајпцинг, Германија, и на 35. издание на Меѓународниот документарен филмски фестивал во Амстердам.

„Љубовната соба“ е меѓу 120-те селектирани нови документарни филмови кои ќе се прикажат во Лајпциг од 17 до 23 октомври. Според оценката на селекторите на фестивалот, македонскиот документарецот има голем потенцијал за меѓународно прикажување и натамошна промоција и претставува филм со меѓународна привлечност, поради што заслужува да биде претставен во програмата на ексклузивниот филмски пазар.

Филмот од 10 до 14 ноември ќе се прикажува и на Меѓународниот документарен филмски фестивал во Амстердам, во официјалната програма на IDFA Академијата 2022. Таму режисерката Диневска ќе има можност да го презентира филмот.

Филмот раскажува две паралелни интимни љубовни приказни во кои главни протагонисти се двете млади жени чии сопрузи се на отслужување на затворска казна во КПД Идризово. Филмот го прикажува социјалниот портрет на двете семејства низ интимниот свет од брачните посети и ефектите што затворот ги има врз семејството и нивното непосредно опкружување.

„Љубовната соба” доби награда на „Агора Докс“ на фестивалот за документарен филм во Солун.