Мет Дејмон откри што е тајната на неговиот 20-годишен брак: „Ова е темелот на нашата врска“

Холивудскиот актер Мет Дејмон, кој ретко зборува за својот приватен живот, направи исклучок за време на промоцијата на новиот филм „Одисеја“ и откри што ја одржува неговата речиси две децении долга брачна заедница со сопругата Лусијана Баросо.

Дејмон и Лусијана се запознале во април 2003 година, а две години подоцна стапиле во брак. Денес имаат четири ќерки – Алексија, Изабела, Џиа и Стела – и успешно го комбинираат семејниот живот со заедничките професионални ангажмани.

Во интервју за списанието *People*, 55-годишниот актер изјави дека нивниот брак се темели на љубов, почит и доверба.

„Во нашиот однос има многу љубов и почит, како и многу доверба. Изграден е на многу цврсти темели“, изјави Дејмон.

Тој додаде дека заедно постојано растат и се развиваат како партнери и нагласи дека токму неговиот брак е „најдобрата работа“ што му се случила во животот.

### Лусијана е и негов професионален партнер

Освен што се грижи за семејството, Лусијана Баросо денес е и партнер во продукциската куќа *Artists Equity*, која Мет Дејмон ја основа заедно со својот долгогодишен пријател Бен Афлек.

Таа неодамна беше продуцент на филмовите „The Instigators“ (2024) и „The Rip“ (2026), во кои игра Дејмон, како и на новиот филм на Бен Афлек – „Animals“.

„Таа чита сè што работам и ги гледа работните верзии на моите филмови. Веќе 23 години се потпирам на нејзините забелешки“, откри актерот.

Дејмон додаде дека му е драго што Лусијана самостојно соработува и со Афлек, особено во периодите кога тој е зафатен со снимања.

Семејството неодамна заедно се појави и на лондонската премиера на филмот „Одисеја“, во кој Мет Дејмон ја толкува главната улога – легендарниот Одисеј.