Обожавателка му подари рачно нацртани патики на Јаков Јозиновиќ – неговиот потег потоа ја расплака од среќа

Популарниот пејач Јаков Јозиновиќ продолжува да освојува срца низ регионот, а по двата спектакуларни концерти во Загреб, една емотивна приказна го привлече вниманието на неговите обожаватели.

Имено, хрватската уметница Ива Ивчиќ, која професионално изработува уникатни цртежи на патики, успеала да ја оствари својата долгогодишна желба – да му подари на Јаков специјално дизајниран пар патики инспириран од неговата музика и настапите во Арена Загреб.

На едната патика бил нацртан Јаков за време на концертот во Загреб, додека на другата се наоѓал мотив од неговиот најнов албум „Ja za čuda letim“. Покрај тоа, на патиките биле испишани неговите иницијали и стихови од новите песни.

Ива го снимила целиот процес на изработка, а потоа успеала лично да му ги предаде патиките зад сцената.

Кога го видел подарокот, Јаков останал видно изненаден.

„Дали си ти нормална? Ова ти го нацрта? Не е ChatGPT? Се шегувам… Ти благодарам, не знам што да кажам“, рекол пејачот низ смеа, додавајќи дека по ваков подарок тешко може да возврати со нешто слично.

Но приказната не завршила тука.

Само еден ден подоцна, Ива доживеала уште поголемо изненадување. Додека го следела вториот концерт на Јаков во Арена Загреб, забележала дека пејачот токму нејзините рачно изработени патики ги носи како дел од сценскиот стајлинг.

Емоциите биле толку силни што таа не можела да ги сокрие солзите.

На социјалните мрежи Ива открила дека со месеци зборувала за оваа идеја и дека била решена патиките да стигнат до Јаков пред неговиот прв настап во Арена Загреб.

„Не знаев како ќе го изведам тоа, но си ветив дека ќе му ги подарам токму за овој концерт. Се распрашував за бројот на обувки, барав контакти и начини да стигнам до него. На крајот сè се намести подобро отколку што можев да замислам“, напишала таа.

Откако му ги предала патиките и ја видела неговата реакција, сметала дека нејзината мисија е исполнета. Но кога забележала дека Јаков навистина ги носи на концертната сцена, следувал момент кој никогаш нема да го заборави.

„Не можев да поверувам. Тоа беше најубавото и најголемо ‘благодарам’ што можев да го добијам. Тоа е доказ дека трудот, љубовта и упорноста секогаш се исплатат“, напишала таа.

Приказната брзо се прошири на социјалните мрежи, а бројни фанови го пофалија Јаков за гестот и начинот на кој покажал почит кон трудот и креативноста на својата обожавателка.

Така, покрај музичкиот спектакл во Загреб, токму овие уникатни патики и емотивната приказна зад нив станаа еден од најубавите моменти од неговата турнеја.