Од Велес до Шведска и назад на македонската сцена: Адријана Арлен со концерт во Скопје

Од Велес до Шведска и назад на македонската сцена: Адријана Арлен со концерт во Скопје

пред 2 часа

Пијанистката Адријана Арлен, која две децении живее и работи во Шведска, својата прва турнеја низ Македонија ќе ја заокружи со концерт во Македонската филхармонија на 7 декември. Велешанката ја започна музичката приказна „Сребрена ноќ 2026“ во родниот град, каде што по 20 години повторно застана пред домашната публика.

На концертот во Велес, одржан на 31 октомври, Арлен изведе класични дела во современи аранжмани и настапи со битолскиот камерен оркестар „ДИВА“. Програмата опфати и филмска музика, авторски композиции и електронски звук.

По Велес, според најавената програма, турнејата продолжи со датуми во Битола и Штип, а последната средба со публиката е закажана во Скопје.

Се врати на клавирот од детството

Концертот во Велес за пијанистката имаше и лична симболика. Таа свиреше на клавирот „Естонија“, на кој почнала да музицира во 1995 година во основното училиште „Св. Кирил и Методиј“.

Арлен почнала да свири на 11 години. Средното музичко образование и Музичката академија ги завршила во Скопје, а потоа магистрирала во Малме, Шведска. Денес таму работи како професорка по клавир во музичко училиште.

Нејзината дискографија, според информациите што ги објави СДК.мк, опфаќа пет компакт-дискови и повеќе видеоспотови.

Класика, филмска музика и современ звук

Првиот концерт од турнејата донесе нејзини обработки на дела од Бетовен, Шопен и Рахмањинов. Во тој дел на сцената настапија и членови на балетското студио „Анабела“ од Велес.

Гостин на вечерта беше саксофонистот Љупчо Станковски, со кого Арлен заедно учела во средното музичко училиште и на академијата. Тој изведе светски поп-хитови од 1990-тите во диско-верзии.

Потоа пијанистката му се придружи на камерниот оркестар „ДИВА“ од Битола, под диригентство на Владимир Димовски. Заедничкиот настап опфатил седум нумери, меѓу кои и филмски теми.

Во завршниот дел од концертот, Арлен изведе свои авторски композиции со велешкиот диџеј Зорбитал. Концертот во Велес го режирал Димитар Оровчанец.

Со најавениот настап во Филхармонијата на 7 декември, пијанистката ќе ја заврши првата турнеја низ Македонија, започната во градот каде што ги направила првите музички чекори.

Извор: Смарт – СДК.мк

Share
Scroll to Top