Пријателката на Меган Маркл откри детали од нејзиниот нов живот во Велика Британија: Објави приватни фотографии од семејството

Најдобрата пријателка на Меган Маркл, Кели Меки Зајфен, сподели ретки фотографии од новиот живот на војвотката од Сасекс во Велика Британија.

Зајфен во средата на Инстаграм објави серија фотографии и видеоснимки од посетата на Меган, на која ѝ се придружил и нејзиниот мал син Џек.

На една од фотографиите Меган го држи бебето во прегратка додека седи покрај дрвена маса во рустично уреден простор. На кратка видеоснимка, пак, Кели го носи синот во носилка додека престојува во место што наликува на традиционален британски паб.

Особено внимание привлече фотографијата на која принцот Хари лежи опуштено на тепих и си игра со малиот Џек. Меган и нејзината долгогодишна пријателка биле фотографирани и додека играат маџонг на маса поставена во зелена градина, а поранешната актерка се смее во моментот кога била направена фотографијата.

Меѓу објавените фотографии има и кадри од идиличната природа, цветни полиња и простории исполнети со сончева светлина. На една од нив се појавува и принцезата Лилибет, која седи на кауч покрај Зајфен и нејзиното бебе.

„Најубаво си поминуваме. Има нешто навистина посебно во тоа да го почувствувам ова магично место со мојата најдобра пријателка, а со нас во авантурата да биде и мојот сладок Џек“, напиша Кели покрај објавата.

Таа додаде дека ѝ било прекрасно да го гледа ова ново животно поглавје низ очите на Меган и да биде дел од нивните секојдневни авантури.

„Времето поминато со семејството беше токму она што му беше потребно на срцето – заедно со пире од грашок и ‘фиш енд чипс’. Сето ова ми го исполни срцето“, напиша таа.

Зајфен порача дека од Велика Британија заминуваат со исполнети срца, но дека таму оставаат и дел од себе. Таа им се заблагодари и на сите луѓе што ги сретнале за време на престојот, нагласувајќи дека било прекрасно да се види со колку љубов била пречекана нејзината пријателка.

„Беше прекрасно да се сведочи на тоа. И вие ѝ недостигавте! Довидување!“, ја заврши објавата.

Обожавателите во коментарите изразија задоволство што Меган е опкружена со семејството и со луѓе кои ја сакаат. Многумина порачаа дека се среќни што повторно ги гледаат неа и Хари во Велика Британија.

Принцот Хари и Меган Маркл минатиот месец ненадејно го напуштија својот дом во Санта Барбара, Калифорнија, наводно со намера повторно да воспостават живот во татковината на Хари и да ги зајакнат односите на нивните деца со кралското семејство.

Принцот Арчи и принцезата Лилибет најпрво биле запишани во подготвително училиште, но поради логистичките проблеми поврзани со патувањето, само два дена подоцна биле префрлени во друго училиште во Велика Британија. Родителите во новото училиште, според медиумските извештаи, биле предупредени да внимаваат чии деца фотографираат.

Војводата и војвотката од Сасекс ја напуштија Велика Британија во 2020 година, откако се повлекоа од должностите како активни членови на кралското семејство. Потоа се преселија во Јужна Калифорнија, каде што започнаа нов живот и склучија повеќе медиумски договори.

Нивното враќање во Велика Британија доаѓа и по завршувањето на профитабилната соработка со „Нетфликс“, која стриминг-платформата не ја продолжи.