Проданоски се сретна со американската амбасадорка Варнс: Во фокусот развојот на Прилеп и продлабочување на соработката

Градоначалникот на Прилеп, Дејан Проданоски, денеска во Општина Прилеп оствари средба со вршителката на должноста амбасадор на Соединетите Американски Држави, Никол Варнс, на која се разговарало за актуелните состојби, развојните процеси и идните приоритети на градот.

Во фокусот на разговорите бил новиот Генерален урбанистички план, кој според Проданоски претставува еден од најзначајните документи за идниот развој на Прилеп.

Како територијално најголема општина во државата, Прилеп има потреба од современо урбанистичко планирање кое ќе овозможи долгорочен развој, подобра инфраструктурна организираност и поквалитетни услови за живот за граѓаните.

На средбата станало збор и за образованието и можностите за продлабочување на соработката со Амбасадата на САД, со цел отворање нови можности за младите во Прилеп.

Тема на разговор бил и туристичкиот потенцијал на градот, при што биле истакнати заложбите Прилеп сè поцврсто да се позиционира на туристичката мапа преку развој на манастирскиот туризам, културното наследство, природните убавини и алтернативните спортови.

Проданоски и Варнс разговарале и за капиталните инфраструктурни проекти, особено за изградбата на обиколниците „Исток“ и „Запад“, кои во иднина треба да придонесат за подобра сообраќајна поврзаност, растеретување на градскиот сообраќај, намалување на метежот и загадувањето, како и за побезбеден и пофункционален сообраќаен систем.

Во рамки на средбата била потврдена и добрата соработка и партнерските односи меѓу Македонија и Соединетите Американски Држави, при што било нагласено дека Општина Прилеп и во иднина ќе продолжи да ги унапредува меѓународните и билатералните односи со пријателските земји, институции и партнери.