Разорните пожари се закануваат на имотот на Бред Пит и Анџелина Џоли: Во опасност и познатата винарија „Миравал“

Големиот шумски пожар што се шири низ југоисточниот дел на Франција се доближи до познатиот имот Château Miraval, луксузната винарија и лозја што некогаш ги поседуваа заедно Бред Пит и Анџелина Џоли, а денес се во центарот на нивниот долгогодишен судски спор.

Над лозјата во близина на селото Коренс се издигнуваат густи облаци од сив и кафеав чад, додека пламените јазици по зајдисонцето го обоија небото во црвени и портокалови нијанси. Токму таму се наоѓа Château Miraval – пространото имение во Прованса кое поранешните сопружници го купија во 2012 година, а две години подоцна на истото место ја направија и својата свадбена церемонија.

Според TMZ, пожарникарите при гаснењето користеле вода и од приватното езеро кое се наоѓа во рамките на имотот. Засега нема официјални информации дали огнената стихија предизвикала штета на лозјата или винаријата, а претставниците на Бред Пит и Анџелина Џоли сè уште не се огласиле.

Пожарите во изминатите денови зафатија повеќе делови од јужна Европа, меѓу кои Франција, Италија и Шпанија. Експертите предупредуваат дека опасноста во наредните недели дополнително ќе се зголеми, особено во Грција, Италија и делови од централна Европа.

Поради огнената стихија своите домови беа принудени да ги напуштат и Џорџ и Амал Клуни. Двојката заедно со нивните деветгодишни близнаци Александар и Ела беше евакуирана од нивната куќа во близина на Брињол.

Џорџ Клуни испрати и писмо до градоначалникот Дидие Бремон, во кое откри дека семејството сè уште не знае дали нивниот дом ќе ја преживее катастрофата.

„Во овој момент немаме претстава дали нашиот прекрасен дом ќе го преживее овој страшен момент“, напиша Клуни.

Тој додаде дека без оглед на исходот, тој и Амал ќе останат дел од локалната заедница и ќе помогнат во обновата на регионот.

Во меѓувреме, пожарот дополнително ја комплицира ситуацијата околу Château Miraval, кој веќе неколку години е предмет на жестока правна битка меѓу Пит и Џоли.

Бред Пит во февруари 2022 година ја тужеше својата поранешна сопруга, тврдејќи дека без негова согласност го продала својот удел во винаријата на компанијата Tenute del Mondo, поврзана со милијардерот Јуриј Шефлер и групацијата Stoli.

Пит тврди дека двајцата имале договор според кој ниту еден од нив не смеел да го продаде својот удел на трета страна без согласност од другиот.

Од друга страна, адвокатите на Анџелина Џоли ги отфрлаат овие тврдења, наведувајќи дека таков договор никогаш не постоел и дека таа имала целосно право самостојно да располага со својот удел.

Тие истакнуваат дека продажбата имала цел финансиски да се одвои од поранешниот сопруг и да обезбеди сопствена финансиска независност, а не да ги решава неговите финансиски интереси.

Судскиот процес околу сопственоста на Château Miraval треба да заврши во февруари 2027 година. Во меѓувреме, адвокатите на Пит добија дозвола да ги испрашуваат претставниците на групацијата Stoli за околностите под кои бил склучен договорот за продажба.

Вредноста на имотот и винскиот бизнис поврзан со него се проценува на околу 164 милиони американски долари, што го прави еден од највредните и најкомплицирани предмети во долгогодишниот развод на холивудските ѕвезди.

Бред Пит и Анџелина Џоли се венчаа во 2014 година, а се разделија само две години подоцна. Официјално беа разведени во 2019 година, додека конечниот договор за развод го постигнаа дури кон крајот на 2024 година, по осум години правни битки.