Светската музичка ѕвезда Селин Дион упати емотивна порака до своите фанови

Светската музичка ѕвезда Селин Дион упати емотивна порака до своите фанови по повод Денот на благодарноста, потсетувајќи колку е важно човек да запре за миг, да земе здив и да се потсети на вистинските вредности во животот.

Во видео објавено на нејзиниот официјален Инстаграм профил, Дион им се обраќа на „драгите пријатели“ со порака што носи мир и топлина.

„Денеска е прекрасен потсетник да забавиме, да земеме длабок здив и да бидеме благодарни. Има нешто навистина моќно во тоа да се собереш со луѓето што ги сакаш – без разлика дали околу полна трпеза, преку телефон или дури и само во срцето“, вели таа во видеото.

Познатата канадска пејачка во 2022 година јавно откри дека боледува од синдром на вкочанета личност – ретко и прогресивно невролошко нарушување што го зафаќа мозокот и ’рбетниот мозок. Болеста сериозно го наруши нејзиниот секојдневен живот и музичката кариера.

Една година подоцна беше објавено дека Дион ја откажува својата „Courage World Tour“, а извор близок до пејачката тогаш за Си-Ен-Ен изјави дека таа „најверојатно никогаш повеќе нема да оди на светска турнеја“.

И покрај здравствените предизвици, во празничното видео Дион зрачи со достоинство и благодарност.

„Толку сум благодарна за моето семејство и за моментите што ги споделуваме заедно – тие ми значат сè“, истакна таа.

На крајот од пораката, пејачката им упати искренa желба на сите свои следбеници: „Нека вашиот Ден на благодарноста биде исполнет со радост, со мир и со благодарност – дури и за малите нешта. Среќен Ден на благодарноста од мене и моето семејство до вас и вашите најблиски.“

Во 2024 година беше објавен и документарниот филм I Am: Céline Dion, во кој пејачката отворено зборува за болната и тешка битка со синдромот, прикажувајќи ја својата ранливост, но и неверојатната сила со која се соочува со болеста.