Сомалијанец дал отказ за да патува низ светот, ја засакал Македонија и реши да остане во Драчево

Мустафа Ахмед  од Сомалија  досега има посетено повеќе од 30 земји низ светот. Тој рече дека дал отказ од работното место само за да може да патува и дека на крајот најмногу му се допаднала Македонија и затоа решил да се пресели тука.

Ја пофали македонската храна и рече дека му се смешни некои од македонските изрази. Има посетено голем број македонски градови и населби, а убавите спомени ги објавува на интернет.

„Некои од балканските изрази не можев да ги разберам. Така кога една постара жена помина покрај мене ми рече ‘да те се**ат кокошките’ се збунив. Кога проверив на „Гугл“ си помислив катастрофа“, рече Мустафа.

Тој е по потекло од Сомалија, но пораснал во Норвешка. Во 2020 година во периодот на пандемија на короната, одлучил да даде отказ и отворил сопствена компанија за консултации во ИКТ секторот. Сега вели дека додека работи истовремено има можност да патува и да посети голем број места во светот.

Првото негово патување му било во Хрватска. Но, не му се допаднало. Вели дека имало многу туристи, па затоа продолжил во Србија, а потоа и Косово, Албанија и Македонија.

„Имам посетено голем број места во светот, но најмногу ми се допадна Балканот. Иако секоја земја ми остави свој впечаток, најубаво се чувствував во Македонија“, рече Мустафа.

Минатата година останал 3 месеци во Македонија, по што продолжил да патува во други земји. Но, брзо потоа одлучил да се врати во Скопје.

„Македонија секогаш ќе остане дел од мене“, рече тој и објасни дека љубовта кон земјата го натерала да објавува видеа на „Инстаграм“ и „ТикТок“. Мустафа редовно ги споделува искуствата и впечатоците кои му ги оставила македонската храна и себно внимание обрнува на македонскиот хумор.

Ги има посетено Битола, Прилеп, Крушево и Струмица, а за Драчево вели дека има најдобар кромид. Планира да остане на Балканот до крајот на годинава, а во 2023-та година планира да ги посети Грузија, Азербејџан и Ерменија.