Тајгер Вудс наскоро излегува од рехабилитација, додека неговата партнерка Ванеса Трамп ја води битката со ракот

Легендарниот голфер Тигер Вудс се подготвува да ја заврши својата тримесечна програма за рехабилитација во Швајцарија, каде што престојува по сообраќајната несреќа и апсењето поради возење под дејство на недозволени супстанции во март годинава. Според информации објавени во американските медиуми, Вудс би требало да го напушти центарот до крајот на месецот, доколку не дојде до непредвидени промени.

Извор близок до голферот открил дека првичниот план бил Вудс да помине три месеци на рехабилитација и дека програмата засега се одвива според предвиденото. Сепак, покрај закрепнувањето, 49-годишниот спортист се соочува и со правни предизвици кои дополнително му создаваат стрес.

Според истиот извор, Вудс е решен повторно да се врати на голф-терените, но пред тоа мора да ја стабилизира контролата на болките и да воспостави редовна фитнес-рутина која ќе му помогне повторно да се натпреварува на високо ниво.

Во меѓувреме, голема поддршка му дава неговата партнерка Ванеса Трамп, која неодамна откри дека се бори со рак на дојка. Според блиски извори, двајцата постојано комуницираат и си даваат меѓусебна поддршка додека минуваат низ тешки животни периоди.

„Тие постојано разговараат и ги споделуваат своите животи како што прават откако се заедно. Тигер е грижлив семеен човек и секогаш е подготвен да помогне, а Ванеса е силна жена која секојдневно се справува со бројни обврски“, изјавил изворот.

Вудс минатиот месец накратко ја прекинал рехабилитацијата за да биде покрај Ванеса поради нејзините здравствени проблеми, но и да присуствува на матурската свеченост на нејзината ќерка Кај, која активно се занимава со голф.

Ванеса Трамп, со која Вудс јавно ја потврди врската во март 2025 година, во мај преку Инстаграм објави дека ѝ е дијагностициран рак на дојка. Тогаш откри дека неодамна била подложена на медицинска процедура и дека останува оптимистична благодарение на поддршката од семејството и најблиските.

Покрај здравствените предизвици, Вудс сè уште го очекува и развојот на судската постапка поврзана со несреќата што се случи на 27 март на островот Џупитер во Флорида.

Според полицискиот извештај, петкратниот шампион на Мастерс турнирот удрил во задниот дел на камион за чистење под висок притисок додека се обидувал да го претекне, по што неговото возило се превртело.

Полицијата навела дека Вудс покажувал знаци на нарушена способност за управување со возило, иако алкотестот бил негативен. Тој одбил да даде примерок за уринска анализа, по што бил обвинет за одбивање на законски тест.

Во полицискиот записник било наведено и дека кај него биле пронајдени две бели таблети, за кои подоцна било утврдено дека се хидрокодон – силен наркотичен лек против болки.

По апсењето, Вудс поминал една ноќ во затворот во округот Мартин, а бил ослободен во раните утрински часови на 28 март. Неколку дена подоцна се појавил пред судија и се изјаснил дека не е виновен по обвиненијата за возење под дејство на недозволени супстанции со предизвикана материјална штета и одбивање на законски тест.

Следното судско рочиште за случајот е закажано за 7 јули, кога се очекува да биде познато како ќе продолжи една од најследените правни драми поврзани со спортските ѕвезди во последните месеци.