„Те сакаме засекогаш“: Синди Крафорд со емотивна порака по смртта на синот Присли

Речиси еден месец по смртта на 27-годишниот Присли Гербер, Синди Крафорд објави заедничка семејна порака во која таа, сопругот Ренди и ќерката Каја се простија од својот син и брат.

Објавата беше споделена денеска, на 18 октомври, на инстаграм-профилот на манекенката, покрај црно-бел портрет на Присли, дело на Себастијан Фаена.

„Скршени сме од загубата на нашиот сакан син и брат“, напиша семејството.

Во пораката, Крафорд и нејзиното семејство изразија благодарност за 27-те години поминати со Присли. Го опишаа како нежна и прекрасна душа, која сакала и била сакана, нагласувајќи дека се горди на неговата добрина и подготвеноста отворено да ја покаже својата ранливост.

Семејството им се заблагодари на сите што им пружиле љубов и поддршка во изминатите недели – и на блиските луѓе и на непознатите што сочувствуваат со нивната болка.

„Додека повторно не се сретнеме, наше мило момче. Те сакаме засекогаш“, гласи завршницата на објавата, потпишана со „Мама, тато и Каја“.

Присли Гербер почина на 20 септември, додека престојувал во установа за рехабилитација во Санта Моника, во Калифорнија. Смртта беше потврдена преку службата на судскиот вештак на округот Лос Анџелес, а претставник на семејството побара почитување на нивната приватност.

Тој почна да се занимава со моделство како тинејџер, следејќи го професионалниот пат на мајка си. Во јавноста зборуваше и за предизвиците со менталното здравје и зависноста, споделувајќи делови од своето искуство и барањето помош.

Неговата сестра Каја претходно ја истакна храброста со која зборувал за тешкотиите, оценувајќи дека неговата искреност имала значење и за други луѓе што минуваат низ слични искуства.

Официјалната причина за смртта сè уште не е утврдена. Иако случајот се истражува како сомнение за предозирање, конечниот наод треба да го соопшти надлежната служба по завршувањето на испитувањата.