ФОТО | По долгото лето на Јадранот, Ибрахимовиќ покажа ново хоби: Улови капитална туна и демонстрираше одлична форма

Златан Ибрахимовиќ пронајде нова активност која бара сила, трпение и издржливост. Поранешниот шведски фудбалер на социјалните мрежи сподели фотографии од риболов, покажувајќи го моментот кога од морето извлекува огромна туна.

На објавените фотографии Ибрахимовиќ е без маица и со заштитен риболовен појас околу половината, додека со двете раце цврсто го држи силно свитканиот стап. Отпорот на рибата очигледно барал сериозен физички напор, но поранешниот напаѓач успешно ја завршил борбата.

На една од фотографиите тој гордо ја држи капиталната туна, чија големина привлече големо внимание кај неговите следбеници. Рибата била толку голема што Ибрахимовиќ едвај ја опфатил со рацете.

Сепак, уловот не завршил на неговата трпеза. Во објавата тој навел „фати и пушти“, посочувајќи дека туната по фотографирањето била вратена во морето.

Покрај големиот улов, внимание привлече и физичката форма на 44-годишниот Ибрахимовиќ. Иако ја заврши професионалната кариера, неговата мускулатура и подготвеност покажуваат дека и понатаму тренира редовно и го одржува телото на ниво на врвен спортист.

Поранешниот голгетер и летово покажа колку ужива во морето, пловењето и активниот одмор. По гостувањето на Спортските игри на младите во Сплит кон крајот на август, тој го продолжи престојот на Јадранот и со јахта се упати кон Кварнер.

Дел од одморот го помина во заливот Чикат на островот Лошињ, каде што комбинираше пловење со тренинзи во боровата шума покрај морето.

Новите фотографии покажуваат дека животот по фудбалот воопшто не му е здодевен. Натпреварувачкиот дух, по сѐ изгледа, само се преселил од фудбалските терени на отворено море, каде што Ибрахимовиќ повторно се насочил кон голем трофеј.